Ermənistan müxalifətinin tələbləri...

Ermənistan Qərblə Rusiya arasında toqquşmanın mərkəzində olmamalı, İrəvanın Ankara və Bakı ilə münasibətlərinin normallaşması ilkin şərt olmadan həyata keçirilməlidir.

PİA.az xəbər verir ki, bu barədə müxalifətin bugünkü mitinqindən sonra oxunan bəyanatda deyilir.

Mitinq iştirakçıları Qarabağ ermənilərinin mübarizəni davam etdirmək üçün kollektiv iradəsini alqışlayıblar və vurğulayıblar ki, “Artsax” Azərbaycanın bir hissəsi ola bilməz.

Bəyanatda qeyd olunur ki, Ermənistanın hazırkı hakimiyyətinin siyasəti respublikanın suverenliyini, ərazi bütövlüyünü təhlükə altına alır, erməni “Artsax”ının mövcudluğunu, “Artsax” ermənilərinin hüquqlarının reallaşdırılmasını təhlükə altına alır. Ermənistan dost ölkələr və müttəfiqlərlə münasibətlərini korlayaraq geosiyasi avantüralara cəlb olunur. Bəyanatda vurğulanır ki, Ermənistan Qərblə Rusiya arasında toqquşmanın mərkəzində olmamalıdır.

“Biz Ermənistan-Türkiyə və Ermənistan-Azərbaycan münasibətlərinin normallaşmasının tərəfdarıyıq, lakin ilkin şərt, gücdən istifadə və ya onun hədə olmadan. Türkiyə-Azərbaycanın “Zəngəzur dəhlizi” ilə bağlı tələbinin heç bir hüquqi qüvvəsi yoxdur”, deyə Ermənistanın Rusiyayönlü müxalifətinin bəyanatında vurğulanıb.

Həmçinin bəyanatda vurğulanır ki, Bakı bütün öhdəliklərini yerinə yetirməli, erməni hərbi əsirləri və digər məhbusları qaytarmalı, qoşunlarını Ermənistanın suveren ərazisindən çıxarmalıdır.

Müxalifət o cümlədən hesab edir ki, Ermənistan hakimiyyətinin yazılı və şifahi bəyanatları, vəd və razılaşmaları heç bir hüquqi qüvvəyə malik deyil və hakimiyyət dəyişikliyindən sonra mütləq etibarsız elan ediləcək. Həmçinin, Ermənistanın beynəlxalq səviyyədə danışıqlar aparan simaları dəyişdirilməlidir

pia.az