Diasporla İş üzrə Dövlət Komitəsinin keçmiş sədri Nazim İbrahimov və iş adamı Hacı İbrahim Nehrəmlinin qardaşı Sahib İbrahimov barəsində cinayət işi üzrə məhkəmə prosesi keçirilib
Bakı Ağır Cinayətlər Məhkəməsində hakimi Ramella Allahverdiyevanın sədrliyi ilə baş tutan prosesdə zərərçəkmiş şəxs qismində Səmayə Babayeva ifadə verib. (teleqraf.com)
O bildirib ki, 2013-cü ildə mənzili Eldəniz Cəfərovdan 141 min manata alıb. Onun sözlərinə görə, istintaqa çağırılanda mənzilin başqa şəxslərə də satıldığını bilib.
Bu zaman prokuror qeyd edib ki, Səmayə Babayevanın mənzili daha 3 nəfərə satılıb.
Zərərçəkmiş isə bundan xəbərsiz olduğunu, heç bir şikayət və tələbinin olmadığını söyləyib.
Prosesdə zərərçəkmiş Gülbacı Hüseynova bildirib ki, həyət evlərini Sahib İbrahimova verib, əvəzində ona 8 mənzil vəd edilib: “Bu barədə Sahib müəllimlə danışdıq, mənzilləri isə bizə Məzahir Cəfərov göstərdi. Sonra problem yarandı, biz şikayətçi olduq. Zərərimiz ödənildi, şikayətim yoxdur”.
Növbəti proses yanvarın 16-na təyin edəcək.
İttihama görə, cinayət işində 52 zərərçəkmiş var. Ümumilikdə zərərçəkmişlərə 2 milyon manat ziyan dəyib.
Sahib İbrahimovun barəsində Cinayət Məcəlləsinin 178.3.2-ci (külli miqdarda dələduzluq törətmək) və 308-ci (vəzifə səlahiyyətlərindən sui-istifadə) maddələri ilə ittiham elan edilib.
Sahib İbrahimov rəhbərlik etdiyi tikinti şirkətinə müraciət edən vətəndaşların pulunu ələ keçirməkdə ittiham olunur.
İstintaq dövründə Sahib İbrahimov tərəfindən zərərçəkmişlərə dəymiş ziyanı ödənilib.
Bu səbəbdən onun barəsində həbs qətimkan tədbiri seçilməyib.
pia.az