General 180 min rüşvət verən polkovniki işdən çıxardı eksklüziv

Musavat.com-un əldə etdiyi məlumata görə Səfərbərlik və Hərbi Xidmətə Çağırış üzrə Dövlət Xidmətinin Qazax rayon şöbəsinin rəisi Rəsul Quliyev vəzifəsindən azad edilib.

Rəsul Quliyev Səfərbərlik və Hərbi Xidmətə Çağırış üzrə Dövlət Xidmətinin rəisi general-leytenant Arzu Rəhimov tərəfindən sərəncama götürülüb.

Qeyd edək ki, Rəsul Quliyev bir neçə gün əvvəl zərərçəkmiş kimi iştirak etdiyi məhkəmə prosesində işə düzəlmək üçün 180 min manat rüşvət verdiyini açıqlamışdı.

Bildirək ki, Bakı Ağır Cinayətlər Məhkəməsində dələduzluqda təqsirləndirilən Məlahət Məmmədovanın cinayət işi üzrə məhkəmə iclası davam etdirilir.

Sonuncu prosesdə iştirak edən Rəsul Quliyev bildirmişdi ki, 2011-ci ildə Məlahət Məmmədovaya Hərbi Komissarlıqda işə düzəltmək adı ilə 180 min manat pul veribmiş. Lakin sonradan o, pulu geri qaytarıb.

Daha əvvəl Müdafiə Nazirliyində çalışdığını deyən R.Quliyev işə düzəlmək istəyən ərəfədə ehtiyatda olduğunu bildirib.

Qeyd edək ki, Məlahət Məmmədova dələduzluqda təqsirli bilinir. O, bir neçə şəxsin etibarından sui-istifadə edərək, ümumilikdə, 300 minə yaxın pulu dələduzluq yolu ilə ələ keçirib.

Bu cinayət işi üzrə zərərçəkmişlər arasında Azərbaycanın əməkdar artisti, müğənni Könül Kərimova da var.

İttiham aktına əsasən, M.Məmmədova müğənninin oğlu Rəşad Rəhimovu Rusiya universitetlərindən birinə qəbul etdirib, daha sonra Azərbaycan Dövlət İqtisad Universitetinə köçürtdürəcəyi vədini verib.

O, bu işə görə, K.Kərimovadan, ümumilikdə, 32 min manat pul alıb. Lakin sonradan verdiyi vədə əməl etməyib.

M.Məmmədova Cinayət Məcəlləsinin 178.3.2-ci (dələduzluq, külli miqdarda) maddəsi ilə ittiham edilir.

Məhkəmənin hazırlıq iclasında məlum olub ki, M.Məmmədova əvvəllər məhkumluq həyatı yaşayıb.

O bildirb ki, 2012-ci ildə dələduzluqda ittiham olunub və Bakı Ağır Cinayətlər Məhkəməsinin hökmü ilə şərti cəza alıb.

pia.az