Nazirlik direktoru problemi həll etmədiyinə görə cəzalandırmaq əvəzinə müəllimə töhmət verib...
Təhsil-eksperti: “İmişli rayon Aranlı kənd 1 saylı tam orta məktəbinin müəlliməsinə töhmət müəllimin davamiyyət məsələsinə və şagirdləri məktəbə gəlməməyə çağır etməsinə görə verilib”.
“Sırf sosial şəbəkələrdə yayılan görüntüyə görə müəlliməyə töhmət verilməsi doğru deyil. Çünki həmin müəllimə məktəbdə olan problemi işıqlandırmağa çalışıb”.
Bu sözləri təhsil-eksperti Elçin Əfəndi İmişli rayon Aranlı kənd 1 saylı tam orta məktəbdə baş verənləri PİA.az-a şərh edərkən qeyd edib.
Xəbər verdiyimiz kimi İmişli rayon Aranlı kənd 1 saylı tam orta məktəbində işləyən Leyla müəllimə dərsi boykot edərək, ayaqyolu tikilənə qədər şagirdlərdən də məktəbə gəlməmələrini istəyib. Sözügedən görüntülər sosial şəbəkələrdə böyük ajiotaj yaradıb. Məktəbin direktoru isə problemi həll etmək əvəzinə müəllimə töhmət verib.
Belə məsələyə görə müəllimin cəzalandırılması hansı məntiqə sığır?
Mövzunu PİA.az-ın əməkdaşı təhsil-eksperti Elçin Əfəndi ilə müzakirə edib.
Elçin Əfəndi: “Həmin müəllimin çəkdiyi görüntüdən sonra ona töhmət verilməsi məsələsi gündəmə çıxdı”.
Çəkdiyi videoya görə müəlliməyə töhmət verilməli olmadığını bildirən ekspert əlavə edib ki, əksinə olaraq müəlliməyə dəstək olunmalı və haqlı tələbi yerinə yetirilməlidir:
“İmişli rayon Aranlı kənd 1 saylı tam orta məktəbinin müəlliməsinə töhmət müəllimin davamiyyət məsələsinə və şagirdləri məktəbə gəlməməyə çağır etməsinə görə verilib. Təhsil Nazirliyi əsas bu amilləri səbəb kimi göstərir.
Amma əslinə qalsa, müəllimənin məktəbdə olan neqativ hal görüntüsünə görə töhmət alması daha inandırıcıdır. Çünki həmin müəllimin çəkdiyi görüntüdən sonra ona töhmət verilməsi məsələsi gündəmə çıxdı. Nəticə etibarilə araşdırmada məlum olur ki, müəllimənin dərsə davamiyyəti ilə bağlı problemlər var.
Sırf sosial şəbəkələrdə yayılan görüntüyə görə müəlliməyə töhmət verilməsi doğru deyil. Çünki həmin müəllimə məktəbdə olan problemi işıqlandırmağa çalışıb. Bununla da problemin həllinə çarə axtarıb. Buna görə müəlliməyə töhmət verilməli deyil. Əksinə olaraq müəlliməyə dəstək olunmalı və haqlı tələbi yerinə yetirilməlidir”.
Nərminə UMUDLU
pia.az