Müasir Müsavat Partiyası 28 May - Respublika Günü münasibətilə Azərbaycan xalqını təbrik edib.
Təbrikdə deyilir:
"Əziz həmvətənlərimiz, Sizi Respublika Günü münasibətilə təbrik edirik! 104 il bundan əvvəl 28 mayda Azərbaycan Xalq Cümhuriyyəti müsəlman aləmində ilk demokratik respublika elan olunub. AXC qısa, amma parlaq taley yaşayıb. Unudulmaz Məhəmməd Əmin Rəsulzadə bizim milli mənlik şüurumuzda dərin izlər qoyub. Biz xalq olaraq Azərbaycan Xalq Cümhuriyyətinin fəaliyyətini və onun qurucularının xidmətlərini həmişə yüksək qiymətləndirmişik.
İnanırıq ki, 104 illik tarixi olan bir dövlətin vətəndaşı olmaqdan hər bir vətəndaş qürur duyur. Bu qürura görə də Cümhuriyyətin qurucularını dərin hörmət və ehtiramla anırıq. Dövlət olaraq da bizim qarşımızda bir çox vəzifələr dayanır. Ən önəmli vəzifə isə Azərbaycanın öz müstəqil siyasətini aparmalı olmasıdır. Çünki xalqımız ancaq müstəqillik şəraitində inkişaf edə bilər.
Partiya olaraq əminik ki, Azərbaycan ildən-ilə güclənəcək və öz iqtisadi potensialını artıracaq. Güclü dövlət olaraq Azərbaycan mövqelərini daha da möhkəmləndirəcək, dünya birliyinə inteqrasiya siyasətini uğurla həyata keçirəcək. Bu yolda ölkənin rəhbərinə uğurlar arzulayırıq.
Məhəmməd Əmin Rəsulzadənin səsi ilə yaddaşlara hopan o şeirdə deyildiyi kimi:
Sən bizimsən, bizimsən, durduqca bədəndə can
Yaşa, yaşa, çox yaşa, ey şanlı Azərbaycan!
Bayramınız mübarək!"
pia.az