“Misli”dən baş aldadan mükafat, ya da 1000 manata neçə yumurta almaq olar?

Bu yaxınlarda uzaq Zambiyada maraqlı hadisə yaşanmışdı. Zambiya çempionatında çıxış edən “Young Africans” komandasının futbolçusuna “matçın oyunçusu” mükafatı olaraq yumurta hədiyyə etmişdilər. Mükafatlandırma mərasimindən sonra əlində 6 kaset yumurta tutan futbolçu kameralar önündə poz da vermişdi.

Ümumiyyətlə, dünyanın bir çox aparıcı ölkələrində futbolçuları motivasiya etmək, həvəsləndirmək üçün müxtəlif hədiyyələr verilir, fərqli nominasiyalar keçirilir. Onsuz da futbolçular yetərincə pul qazanan şəxslər sırasında öncüllərdəndir. Bir növ xırda pullarla onları həvəsləndirmək, nəyəsə maraqlandırmaq çətin məsələdir. Elə bu səbəbdən də belə nominasiyaları elan edənlər yaxşı-yaxşı düşünür, ortaya sanballı iş qoyurlar.

Azərbaycanın mərc oyunları operatoru “Milsi” də Azərbaycanın futbol üzrə çempionatının, yəni Premyer Liqanın sponsorudur. Ölkənin əsas çempionatında “Misli”nin adı çəkilir, stadionları mərc operatorunun reklam bannerləri “bəzəyir”.

Oyunların televiziyadan yayımı zamanı tez-tez “Misli”nin reklamları nümayiş etdirilir, insanlara idman oyunlarına mərc qoymağa çağırışlar səsləndirilir. Artıq idman, futbol bir kənarda qalır, ağlı kəsən də, kəsməyəndə diqqətini “Misli”yə yönəldir. Hamı düşünür ki, bu yolla asan qazanc əldə edəcək. Bu mədəni qumarın mənfi tərəfləri öz yerində. Mövzuya qarşıdakı yazılarımızda yenidən qayıdacaq, mərc oyunlarının fəsadlarından, mərc şirkətlərinin insanları necə tora salmasından yazacağıq.

Bu gün isə mövzumuz məsələnin digər tərəfidir. “Misli” az xərclə özünə böyük reytinq toplamaq, geniş təbliğat şəbəkəsi qurmaq niyyətindədir. Təəssüflər olsun ki, AFFA və PFL-in “Misli” ilə bağladığı müqavilənin detalları açıqlanmır. Ona görə də “Misli”nin Azərbaycan Premyer Liqasının ad haqqı üçün nə qədər ödədiyi barədə rəsmi məlumat yoxdur. Amma gözümüzün önündə olan bir məqam var ki, ona əsasən “Misli”nin Azərbaycan futboluna qarşı o qədər də səxavətli olmadığını yəqin etmək olar.

Peşəkar Futbol Liqası və “Misli” “ayın qolu” layihəsini gerçəkləşdirir. Hər ay azarkeşlərin sosial şəbəkələrdə verdiyi səslər əsasında ayın ən yaxşı qolu seçilir. Qolun müəllifi isə kameralar qarşısında təntənəli şəkildə mükafatlandırılır. Bu yolla “Misli” özünü bir daha reklam edir, Azərbaycan futboluna sponsorluq etdiyini göstərməyə çalışır. Lakin qalibə verilən mükafat günümüzün reallıqlarında çox cüzidir. Belə ki, ən yaxşı qolun müəllifinə cəmi min manat mükafat verilir. Premyer Liqada çıxış edən, aylıq qazancı 10 min manatlarla ölçülən futbolçular üçün bu məbləğ “semiçka pulu”dur. Həmin pulla uzaqbaşı Bakının bərkgedən restoranlarında 3-5 nəfəri başına yığıb, yaxşı bir axşam yeməyi yeyə bilərsən. Vəssalam.

Bu 1000 manatın ətrafında qurulan şou isə qat-qat artıq məbləğdə qiymətləndirilməli, ayın ən gözəl qolunun müəllifi daha böyük mükafata layiq görülməlidir. Sözsüz ki, çempionatın sponsoru xəsislik etməsə. Necə deyərlər, buna da şükür etmək lazımdır. Bir də gördük ki, “Misli” uzaq Afrika ölkələrindən nümunə götürdü və futbolçulara yumurtayla süd-qatıq verdilər...

Tural
Poliqon.info