Kanslerin bənzəri və qan üzərində içilən and: “Reyxsburqerlər” Soltsu necə devirəcəkdi…

PİA.az Almaniyada dövlət çevrilişinə cəhdin yeni təfərrüatlarını oxucularının diqqətinə çatdırır.

Siyasətçilərin ünvanları və edam siyahıları, üsyançıların 71 yaşlı lideri “şahzadə XIII Henrixə” yazılı sədaqət andı, müsadirə edilmiş onlarla silah, gümüş və qızıl sikkə anbarları və daha çox fantastik təfərrüatlar.

Mətbuatda “Reyxsburqer sui-qəsdi” olaraq adlandırılan dövlət çevrilişinin yeni təfərrüatları ortaya çıxır. İstintaq araştırmasına görə, müasir Almaniyanı indiki sərhədləri və qanunları ilə inkar edən “Reyx vətəndaşları” sektası Milad bayramından əvvəl kansler Olaf Şolzu devirmək və hətta onu oxşarı ilə əvəzləmək niyyətində olub. Və “ən nifrət edilən” nazir, Səhiyyə Nazirliyinə rəhbərlik edən Karl Lauterbax canlı yayımda kovid dissidentləri tərəfindən canlı yayında həbs ediləcəkdi.

Kartlar, pullar, qırx tüfəng

The New York Times qəzetinin istintaqa yaxın mənbələrə istinadən verdiyi məlumata görə, Almaniyada 150 gizli evdə aparılan axtarış zamanı əməliyyatçılar 40 odlu silah, o cümlədən tüfəng və hələ tapılmamış digər silahlar üçün nəzərdə tutulmuş minə yaxın patron ələ keçiriblər. Polis həmçinin arbalet yaylar üçün qoruyucu jiletlər tapıb.

Der Spiegel jurnalının məlumatına görə, “sui-qəsdin gizlin saxlanılması üçün 130 yazılı and tapılıb. Bu andların pozanlar “ölüm cəzası” ilə cəzalandırılacaqmış.

Der Spiegel bildirir bu barədə Almaniya Daxili İşlər Nazirliyinin rəhbəri Nensi Feser Bundestaq komitəsinin qapalı iclasında məlumat verib.

Əməliyyatçılar həmçinin “yüz minlərlə avro dəyərində olan gizli pul anbarları, gümüş və qızıl sikkələr aşkar ediblər. İsveçrə bankının hücrəsində saxlanılan 6 milyon avro dəyərində qızıl külçələr haqqında da yeni faktlar ortaya çıxıb. Elə bu vəsaitlər hesabına da dövlət çevrilişinin maliyyələşdirilməsi nəzərdə tutulub.

Üsyançıların nüvəsini təxminən əlli nəfər təşkil edildiyi güman edilir. 31 şübhəli istintaq altındadır, 23 “Reyxsburqer” isə həbs edilib. Onların arasında özünü XIII Henrix, Royss şahzadəsi adlandıran 71 yaşlı sui-qəsdçilərin lideri də var (müasir Almaniyada şahzadələrin və zadəganların olmasına baxmayaraq, bütün zadəgan titulları və imtiyazları 1918-ci ildə Veymar Respublikası tərəfindən ləğv edilib).

Şahzadənin konsaltinq firmasının ofisi və eyni zamanda elit qolf klubu kimi xidmət edən Saaldorfdakı ovçuluq qəsrində “Reyxsburqçular” müntəzəm olaraq AFR-nin konstitusiya quruluşunu devirmək planlarını müzakirə etmək üçün toplaşıblar.

Frankfurter Rundschau qəzeti müəyyən edib ki, sui-qəsdçilər əsas zərbəni Milad bayramından əvvəl həbslər və genişmiqyaslı siyasi təmizləmələr şəklində vuracaqlarmış. Reyxstaqa hücum və bir çox deputatın tutulması “X” gününə planlaşdırılıb. Deputatların parlament binasından qandallı aparılacağı bildirilir.

Əməliyyatçılar sui-qəsdçilərin məkanlarından “xalq düşmənləri”nin çoxsaylı siyahılarını, hətta onların ünvanlarını tapıblar. Bu “xalq düşmənləri” arasında siyasətçilər, hakimlər, vətəndaşları koronavirusa qarşı peyvənd edən həkimlər olub. Pandemiya illərində onlar sui-qəsd nəzəriyyəçiləri və anti-vaksin tərəfdarları tərəfindən xüsusi nifrət obyektinə çevrildilər. Amma “Reyxsburqçular”ın əsas hədəfi yenə də ən yüksək səviyyədə icra hakimiyyətinin nümayəndələri olub.

Şolts əsil Şolts deyil

NYT-nin məlumatına görə, sui-qəsdçilərin əsas siyahısına Almaniyanın 18 federal səviyyəli siyasətçisi daxil edilib. Müstəntiqlərin əllərində müttəhimlərin “edam ediləcəyi və ya sürgünə göndəriləcəyi” barədə sübutlar var. Məsələn, səhiyyə naziri Karl Lauterbaxın televiziyada tok-şouda canlı yayında həbs edilməsi və Kalaşnikov avtomatları ilə silah gücünə studiyadan çıxarılması nəzərdə tutulurdu.

Bayerischer Rundfunk radiosuna görə, qrupun üzvlərindən biri, Bundesverin keçmiş polkovniki, anti-covid məhdudiyyətlərini və peyvəndi təbliğ edən siyasətçiləri “divara söykəməyi” vəd etdiyi bir video çəkib. “Uşaqlarımızın qisasını alacağıq”, deyə polkovnik-leytenant videoçarxda öz hədəsini səsləndirir.

NYT mənbələri bildirir ki, qrup təkcə Almaniya parlamentini ələ keçirməyi deyil, həm də kansleri öldürməyi planlaşdırıb.

Olaf Şolts özü isə ona qarşı sui-qəsd hazırlığı ilə bağlı yayılan xəbərlərə hələlik münasibət bildirməyib. Sızdırılan məlumatlara görə, sui-qəsdçilər vətəndaşlara təqdim etmək üçün Şoltsun bənzərini axtarıblar. Yalançı kansler xalqın gözü qarşısında çevrilişə xeyir-dua verməli idi. Lakin hələlik belə bir dublikat tapılmadığı üçün sui-qəsdçilər Federal Prezident Frank-Valter Ştaynmayerin dublikatı ilə kifayətlənməli olublar.

“Reyxsburqçular” “inqilabi nizam”ın yaradılması üçün üç yüzə yaxın “milli təhlükəsizlik şirkətləri” yaradıblar. Bunun üçün gizli poliqonlarda atıcılıq təlimləri keçirilib. “Milli təhlükəsizlik şirkətləri”nə daxil olanlar əsasən keçmiş polis və hərbçilərdən, paraşütçülər və xüsusi təyinatlılardan ibarət təşkil edilib.

Şahzadənin əyanları

Onlardan biri, əvvəllər Bundesverin 251-ci paraşütçü batalyonuna komandirlik etmiş 69 yaşlı istefada olan baş leytenant Rüdiqer fon P. güc strukturlarında ən yüksək vəzifələrin birinə iddialı imiş. Şahzadənin alternativ kabinetində ədliyyə naziri vəzifəsi bir hakimə və “Almaniya üçün alternativ” Partiyasından Bundestaqın keçmiş deputatı Briqit Malzak-Vinkemanna söz verilib. Hazırda o da həbsdədir.

Ya başına tac qoymağı, ya da Reyx kansleri Bismark kimi ömürlük Rexskansler olmağı düşünən XIII Henrixin məiyyəti arasında bir xanım astroloq da var. Bu xanım üçün də “transkommunikasiyalar” nazirliyinin yaradılması nəzərdə tutulub Aşağı Saksoniyadan olan anti-vaksinçi həkim isə "mənəviyyat və şəfa üzrə nazir" təyin ediləcəkmiş.

Mətbuat Almaniyanı idarə etməyə iddialı olan digərlərinin də adlarını çəkir. Onların arasında sadə dam ustası, “Mişelin ulduzlu” restoranın aşpazı, Alman aviaşirkətinin pilotu, hətta opera tenoru da var.

“Bütün bunlar böyük bir dəlixana kimi görünür. Lakin təfərrüatlar daha çox narahat edicidir”, deyə Spiegel onlayn resursunda qeyd edir.

Beləliklə, “Reyxsburqçular”ın məhkəməsi Almaniyada son illərin ən səs-küylü məhkəməsi olacağını vəd edir.

Tərcümə PİA.az-a aiddir

pia.az