Estoniyanın Ukraynaya qoşun göndərəcəyi istisna olunmur...

Poliqon ERR Ahentliyinə istinadən xəbər verir ki, parlamentin iclası zamanı Estoniyanın Baş naziri Kaya Kallas Mühafizəkar Xalq Partiyasının (EKRE) üzvlərinə ölkə ordusunun Rusiya-Ukrayna münaqişəsinə qarışmayacağına dair zəmanət verməkdən imtina edib.

“Mən belə vədlər vermirəm, çünki şərait dəyişə bilər. Sizin şərhinizdən görünür ki, müdaxilə hər hansı bir şey ola bilər. Bizim Ukraynaya hərbi yardımımız Rusiya tərəfindən də müdaxilə kimi qiymətləndirilə bilər, çünki biz həqiqətən Ukraynanın qalib gəlməsini, Rusiyanın uduzmasını istəyirik”, Baş nazir bildirib.

Xanım Kallas hökumətin Ukrayna ərazisinə qoşun yeritmək planlarının olub-olmaması sualını da cavablandırıb. Baş nazirin sözlərinə görə, Estoniya hökümətində hazırda Ukraynaya qoşun yeritmək müzakirə olunmayıb. Kallas izah edib ki, yalnız hərbi ekspertlərin göndərilməsi müzakirə olunub.

Baş nazir qeyd edib ki, hər hansı bir yerə qoşun göndərmək üçün parlament mandatı lazımdır və Baş nazirin özü parlamentdən yan keçməklə belə qərarlar qəbul edə bilməz.

Poliqon.info