Deputat: "Prezident bu məsələni diqqətdə saxlayır"

Bu sözləri Axar.az-a açıqlamasında Milli Məclisin Gənclər və İdman komitəsinin üzvü, millət vəkili Naqif Həmzəyev deyib. Deputat bildirib ki, son dövrlərdə gənclər siyasətinə çox böyük önəm verilir:

“Gənclərə yatırım dövlətimizin, millətimizin, xalqımızın gələcəyi üçün edilmiş yatırımdır. Ölkə başçısı savadlı gənclərin sayının artırılması məsələsini daim diqqətdə saxlayır. Bilirsiniz ki, bundan öncə dövlət tərəfindən xaricdə təhsillə bağlı xüsusi proqram həyata keçirildi və nəticədə 5000-ə yaxın gəncimiz xaricdə təhsil aldı. Ancaq indi Azərbaycan universitetlərinin potensialı güclənir, ölkəmizdə Avropa standartlarına cavab verən universitetlərin sayı getdikcə artır. Artıq Avropa və dünya ölkələrinin qabaqcıl universitetləri ilə rəqabətə girə biləcək ali məktəblərimiz var. Burada ADA universitetinin adını xüsusi qeyd etmək istərdim. Bu universitetlərdə kifayət qədər savadlı gəncimiz təhsil alır. Həmin gənclər Azərbaycanda kadr bazasını daha da zənginləşdirirlər.

Gördüyünüz kimi, ölkədə gənclərə hər zaman qayğı ilə yanaşılıb, onlar üçün lazımi şərait yaradılıb. Azərbaycanın bütün rayon və şəhərlərində “Gənclər Evi” yaradılıb ki, bu qurumlar bütövlükdə gənclərin potensialını ortaya çıxarmaq üçün xidmət göstərir”.

Millət vəkili vurğulayıb ki, istənilən ölkədə gəncləşdirmə siyasəti labüddür və vacibdir:

“Ölkəmizin hərtərəfli inkişafında gənclərimizin çox böyük rolu var. Gənclər müxtəlif sahələrdə çox uğurla fəaliyyət göstərir, ölkəmizin ümumi inkişafına böyük töhfə verirlər. Son dövrlərdə Prezident İlham Əliyev tərəfindən gənclərə göstərilən etimad bunun bariz nümunəsidir. Düşünürəm ki, belə addımlar gələcəkdə də atılacaq. Kadr islahatları zamanı gənclərin ön plana çəkilməsi struktur islahatlarının tərkib hissəsidir.

2019-cu il başlayandan bəri bir çox islahatların şahidi olduq. Belə ki, artıq çevik idarəetməyə keçilir, bir-birini təkrarlayan dövlət qurumları birləşdirilir, onların fəaliyyəti daha da optimallaşdırılır. Bu işlərdə isə gənclərin potensialından və enerjisindən istifadə olunur. Hər zaman olduğu kimi, bu gün də gənclərə etimad göstərilir. Gənclər də bunu düzgün qiymətləndirməyi bacarıb, onlara göstərilən etimadı doğrultmalıdırlar”.

pia.az