Cənubi Qafqazda Rusiyaya qarşı ABŞ Ermənistanın təhlükəsizliyini təmin edə bilərmi?

Politoloq: “ABŞ prezidenti Co Baydenin məktubu Ermənistanda müəyyən ruh yüksəkliyi doğurub”.

“Onsuz da, bölgədə çox ciddi şəkildə rəqabət gedir. ABŞ, Kollektiv Qərb Rusiyanı bölgədə sıxışdırmaq istiqamətində addımlar atır”.

Bu sözləri politoloq Oktay Qasımov ABŞ prezidentinin Paşinyana göndərdiyi məktubu Poliqon-a şərh edərkən qeyd edib.

ABŞ prezidenti Co Baydenin Ermənistanın Baş naziri Nikol Paşinyana ünvanladığı məktubda təhlükəsizliklə bağlı əməkdaşlığın gücləndirilməsi fikrini irəli sürüb.

İrəli sürülən bu fikir ABŞ-ın yeni strateji hədəflərindən biridirmi? Ümumiyyətlə, Vaşinqton Rusiyaya qarşı Cənubi Qafqazda Ermənistan dövlətinin təhlükəsizliyini təmin edə bilərmi?

ABŞ-ın Ermənistan siyasətini Poliqon-un əməkdaşı politoloq Oktay Qasımov ilə müzakirə edib.

Oktay Qasımov: “Hər bir halda bu məktubla ABŞ Ermənistana müəyyən qədər dəstək vermiş oldu”.

Rusiyanın bölgədə mövqeyi zəifləsə də, bütün hallarda Ermənistanda Moskvanın kifayət qədər təsir imkanlarının olduğunu xatırladan politoloq əlavə edib ki, Rusiya bölgədən asanlıqla çıxmaq niyyətində deyil:

“Təbii ki, ABŞ prezidenti Co Baydenin məktubu Ermənistanda müəyyən ruh yüksəkliyi doğurub. Ermənistanda hesab edirlər ki, bu məktubla artıq Rusiyadan uzaqlaşmaq mümkün olacaq və ABŞ Ermənistanı müdafiə edəcək.

Onsuz da, bölgədə ciddi şəkildə çox ciddi şəkildə rəqabət gedir. ABŞ, Kollektiv Qərb Rusiyanı bölgədə sıxışdırmaq istiqamətində addımlar atır. Şübhəsiz ki, ABŞ Cənubi Qafqazda Rusiya ilə rəqabətə girib.

Hər bir halda bu məktubla ABŞ Ermənistana müəyyən qədər dəstək vermiş oldu. Baydenin məktubundan əvvəl də ABŞ Ermənistan üçün hesablanmış addımlar atırdı. Məsələn Ermənistanda olan ABŞ səfirliyinin say tərkibinə baxıldı, eyni zamanda son günlərdə ABŞ-dan Ermənistana olunan yüksək səviyyəli ziyarətlər, o cümlədən hərbi təlimlər ABŞ-ın bölgəyə marağını ciddi şəkildə artdığının bir sübutudur.

Görünən odur ki, proses davam edir. Nəticəsi ilə bağlı indidən nəysə söyləmək çətin olacaq. Rusiyanın bölgədə mövqeyi zəifləsə də, bütün hallarda Ermənistanda Moskvanın kifayət qədər təsir imkanları var. Rusiya bölgədən asanlıqla çıxmaq niyyətində deyil”.

Nərminə UMUDLU
Poliqon.info