ABŞ Ankaraya F-16 qırıcılarının satışına dair razılaşmanı təsdiq edərsə, Türkiyə İsveçin NATO-ya daxil olmasını dəstəkləyəcək...
Poliqon xəbər verir ki, bu barədə Türkiyənin "Hürriyet" qəzeti mənbələrə istinadən məlumat yayıb.
Qəzetin yazdığına görə, Finlandiya və İsveçin üzvlük məsələsi gündəmə gələndən sonra bu məsələdə pərdəarxası müsbət nəticələr əldə edildiyi barədə şayiələr dolaşır.
Hökumət dairələrinə yaxın qəzet köşə yazarı Abdulkadir Selvi bəzi ölkələrin Türkiyəyə silah tədarükünə tətbiq edilən gizli embarqonun aradan qaldırıldığını bildirib.
Yazar qeyd edir ki, İsveçin müraciətini təsdiqləmək Türkiyə üçün problem deyil və bütün məsələ ABŞ-ın etibarsızlığıdır. Abdulkadir Selvi hesab edir ki, bu inam yaranarsa, İsveçin yolu açılacaq.
Dekabrın 6-da Türkiyə prezidenti Rəcəb Tayyib Ərdoğan İsveçin NATO-ya müraciətinin ratifikasiya prosesini başa çatdırmaq üçün ABŞ-dan F-16 qırıcıları tədarük edəcəyini gözlədiyini bildirib. Hələlik İsveçin Alyansa üzvlüyünü yalnız Türkiyə və Macarıstan ratifikasiya etməyib.
Poliqon.info