Babək prospektində bərpa işləri bu axşam yekunlaşacaq

Bunu Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli deyib.

Mətbuat xidmətinin rəhbəri qeyd edib ki, sözügedən yolda heç bir çökmə baş verməyib:

“Babək prospekti, təqribən 80-ci illərdə salınıb. O vaxta qədər bura neft tullantıları ərazisi olub. Prospektin o vaxtlar həmin tullantılar üzərindən salınması da bu gün yolun müəyyən hissələrində asfalt-beton örtüyünün deformasiyaya uğramasına səbəb olub. Hazırda ərazidə əməkdaşlarımız tərəfindən bərpa işləri görülür. Yaranmış problem təqribən saat 6-ya qədər yekunlaşacaq”.

* * *

Bakıda yeni əsaslı təmirdən çıxan prospektdə yol çöküb.

Babək prospektinin "Monte Karlo" restoranı yaxınlığındakı hissəsində asfalt örtüyü təxminən 100 metr məsafədə çöküb və çuxur yaranıb.

Hazırda yol həmin hissədə maşınların hərəkəti üçün bağlanıb. Asfaltın həmin hissəsində üst örtüyü qaşınıb və bərkitmə işləri aparılıb. Bu gün axşam saatlarına kimi yolun istifadəyə verilməsi gözlənilir.

Qeyd edək ki, prospekt dekabrın 10-da sürücülərin istifadəsinə verilib. (Qafqazinfo)

pia.az