“Sərhədsiz Reportyorlar” təşkilatının builki “Cəsarət Mükafatı” İranın həbsə atdığı xanım jurnalistə verilib…
Nərgiz Mohəmmədi son 12 ildə dəfələrlə həbs olunub.
PİA.az BBC-yə istinadən xəbər verir ki, bazar ertəsi, dekabrın 12-də Sərhədsiz Reportyorların 2022-ci il üçün “Cəsarət Mükafatı”nın qalibi elan edilib. Mükafat İranın Evin həbsxanasında məhbus olan ictimai fəal Nərgiz Mohammədiyə verilib. Xanım Mohəmmədi həmçinin BBC tərəfindən dünyanın yüz ən nüfuzlu və ilhamverici qadınlarından biri seçilib.
Qeyd edək ki, bu ilki mükafatlandırma mərasimi Parisdə keçirilib.
“Sərhədsiz Reportyorlar” təşkilatı hər il verdiyi bu mükafatı demokratiya və insan haqlarına töhfə vermək üçün jurnalistikadan istifadə edən qeyri-adi insanlara verdiyini açıqlayıb.
Xanım Mohəmmədini mükafatlandırma mərasimində onun adından qızı təmsil edib və mərasimdə həbsdə olan jurnalistin mesajı oxunub. Mesajda Nərgiz Mohəmmədi deyib: “Mən bu mesajı yazarkən 60-dan çox qadın siyasi məhbusun əhatəsindəyəm, ölkədə xalq üsyanında və hökumətin repressiyaları davam edir”.
Mükafatı xanım Mohəmmədinin adından övladları və həyat yoldaşı alıb.
“Sərhədsiz Reportyorlar” təşkilatı bu münasibətlə yaydığı açıqlamada bildirib ki, son on iki ildə dəfələrlə həbsdə olan xanım Mohəmmədi həbsxananın içindən belə, xüsusən də həmkarları haqqında reportajlarını heç vaxt dayandırmayıb.
Qeyd edək ki, Nərgiz Mohəmmdinin tanınması üçün ona bir sıra beynəlxalq mükafatlar verilib. Xanım Mohəmmədi 2009-cu ildə Alexander Langer mükafatına, 2011-ci ildə İsveç hökuməti və canlı tarix fondu mükafatına, 2016-cı ildə Ümumdünya Mətbuat Azadlığı Günü Mükafatına, 2018-ci ildə Amerika Fizika Cəmiyyətinin Saxarov Mükafatına layiq görülüb.
pia.az