"Nestle" bakteriya ilə çirklənməyə görə 2 milyon "Perrier" şüşəsini məhv edib

Poliqon xəbər verir ki, bu barədə "Le Monde" qəzeti şirkətin açıqlamasına istinadən yazır.

"Nestle Waters" izah edib ki, mart ayında Monika qasırğası zamanı çox güclü yağış nəticəsində suyun tərkibində "nöqtəli mikrobioloji anormallıqlar" aşkar edilib. Qard departamentinin səlahiyyətliləri əlavə edib ki, martın 10-dan bir neçə gündür suyun "Escherichia coli və Pseudomonas aeruginosa" ilə çirklənməsi qeydə alınıb. Bununla əlaqədar olaraq səlahiyyətlilər "Nestle Waters"dan quyulardan birinin istismarını dərhal dayandırmağı tələb ediblər.

Yanvar ayında "Les Echos" qəzeti "Nestle Waters"ın Fransa bölməsinin ultrabənövşəyi işıq və karbon filtrlərindən istifadə edərək çirklənmiş suyu təmizlədiyi məlumatları dərc edib. Bu cür təmizləmə üsulları Aİ-də qablaşdırılmış mineral suyun istehsalı üçün qadağandır.

Fransa qəzetlərinin yazdığına görə, "Nestle Waters"ın Fransa bölməsi tərəfindən istehsal olunan içki markalarının üçdə biri qayda pozuntusu ilə istehsal edilib. Onların arasında "Perrier", "Vittel", "Hepar" və "Contrex" var. Fevral ayında "Foodwatch" İstehlakçıların Hüquqlarını Müdafiə Assosiasiyası hakimiyyət orqanlarından "Nestle Waters" şirkətini istehsal standartlarını pozduğuna, habelə bu barədə məlumatı gizlətdiyinə görə məsuliyyətə cəlb etməyi tələb etmişdi.

Poliqon.info