Yaponiyanın hakim Liberal Demokratik Partiyası (LDP) bu il konstitusiyaya yenidən baxılması ilə bağlı referendum keçirmək istəyir...
Poliqon xarici mətbuata əsasən xəbər verir ki, bu barədə hakim partiyanın martın 17-də keçiriləcək qurultayında təsdiqlənməsi gözlənilən fəaliyyət proqramının layihəsində deyilir. Bu layihəyə görə, hakim partiya konstitusiyaya ölkənin silahlı qüvvələrinin qanuniliyi ilə bağlı müddəanı daxil etmək niyyətindədir.
Xatırladaq ki, Yaponiyanın hazırkı konstitusiyası 1947-ci ildə Tokionun İkinci Dünya Müharibəsində məğlubiyyətindən sonra qəbul edilib və o vaxtdan bəri heç bir dəyişiklik edilməyib. Mpvcud konstitutsiyanın doqquzuncu maddəsi ölkənin hərbi potensiala malik olmasını, ordu, hava qüvvələri və donanma yaratmasını qadağan edir. Lakin Yaponiyada hələ 1954-cü ildə formal olaraq ordu sayılmayan Özünümüdafiə Qüvvələri yaradılıb.
Bu ziddiyyəti həll etmək üçün LDP ardıcıl olaraq Doqquzuncu Maddənin dəyişdirilməsinin tərəfdarıdır. Hakim partiyanın fəaliyyət proqramının layihəsində deyilir: “Konstitusiyaya yenidən baxılması üçün biz bu il ərzində referendum keçirməklə xalqın fikrini öyrənməyə çalışacağıq”.
Bunun üçün deputatların üçdə ikidən çoxunun səs verməli olduğu müvafiq qətnamənin parlamentdə təsdiqlənməsi nəzərdə tutulur. LDP bu qədər səsi təmin edəcəyinə əmindir. Referendumda qərar qəbul etmək üçün sadə səs çoxluğu tələb olunur və bu günə qədər Yaponiyada heç vaxt milli səviyyədə rəy sorğusu keçirilməyib.
Poliqon.info