Bayden husilərə zərbələri mütənasib və zəruri tədbir adlandırıb

Poliqon xəbər verir ki, Bayden bu barədə Senat və Nümayəndələr Palatasının spikerlərinə məktubunda yazıb. Prezidentin sözlərinə görə, zərbələr husiləri çəkindirmək və zəiflətmək üçün tətbiq edilib.

“Birləşmiş Ştatlar beynəlxalq hüquqa uyğun və millətin özünəməxsus özünümüdafiə hüququndan istifadə edərək bu zəruri və mütənasib hərəkətləri edib”, deyə Bayden məktubunda yazıb.

ABŞ prezidenti əlavə edib ki, zərbələr eskalasiya riskini məhdudlaşdırmaq və mülki əhali arasında itkilərdən qaçmaq məqsədilə həyata keçirilib. Baydenə görə hücumun məqsədi husilərin Qırmızı dənizdə beynəlxalq gəmiçiliyə növbəti hücumlar etmək qabiliyyətini sarsıtmaqdır.

Co Bayden bu qəarar müstəqil olaraq qəbul etdiyini bildirib, çünki o, ABŞ-ın ali baş komandanı, icra hakimiyyətinin başçısı və ölkənin xarici siyasətinə cavabdehdir. Birləşmiş Ştatların prezidenti “təhdidlərlə mübarizəyə və hücumların qarşısını almağa” davam etməyə hazır olduğunu açıqlayıb.

Qeyd edək ki, yanvarın 12-də ABŞ və Böyük Britaniya Yəməndə 16 məntəqədə husilərin hədəflərinə 60 zərbə endirib. Ölkə bu qərarı hərəkatın Qırmızı dənizdə ticarət gəmilərinə hücumlarının artması ilə əsaslandırıb. Husilərin bildirdiyinə görə, 73 hava zərbəsi endirilib, nəticədə 5 əsgər həlak olub.

Poliqon.info