Bayden dondurulmuş Rusiya aktivlərinin Ukraynaya transferini dəstəkləyib

Poliqon xəbər verir ki, bu barədə Bloomberg Agentliyi ABŞ Milli Təhlükəsizlik Şurasının Senatın Xarici Əlaqələr Komitəsinə noyabr ayında göndərdiyi məktubua və Konqresdəki mənbələrə, o cümlədən prezident Co Baydenin administrasiyasına istinadən məlumat yayıb.

“Qanun layihəsi icra hakimiyyətinə Ukraynanın maraqları naminə Rusiyanın suveren aktivlərini ələ keçirmək üçün lazım olan səlahiyyətləri verəcək”, deyə sənəddə deyilir.

Qanun layihəsinə görə, müharibənin başlanmasının ikinci ildönümünə az qalmış G7 sammitində belə bir tədbirin tətbiqinin müzakirəsi planlaşdırılır. ABŞ Konqresi hesab edir ki, bu tədbir Ukraynaya əlavə maliyyə yardımı kimi qəbul edilə bilər, lakin qanun layihəsi Senat komitəsi və Nümayəndələr Palatasının rəhbərləri tərəfindən razılaşdırılmalıdır.

Təşəbbüsün həyata keçirilməsinin prosesinin uzanması Avropa ölkələrinin, yəni Almaniya və Fransanın, eləcə də Avropa Mərkəzi Bankının Rusiyanın aktivlərinin ötürülməsinin münaqişənin gərginləşməsinə səbəb olacağı ilə bağlı narahatlığı ilə bağlıdır. Həmçinin qanun layihəsinin qəbulu ilə bağlı risklər arasında dolların sabitliyinin mümkün pozulması da var.

Qeyd edək ki, yanvarın 6-da Ukrayna prezidenti Vladimir Zelenski müttəfiqlərdən Rusiyanın dondurulmuş aktivlərinin köçürülməsini sürətləndirməyi tələb edib. Həmçinin ötən ilin sonunda ABŞ və Avropa Ukraynaya maliyyə yardımının ayrılması ilə bağlı razılığa gələ bilməyib.

Poliqon.info