Türkiyədə Azərbaycan hərbçilərinin də qatıldığı "Erciyes-2023" təlimləri başa çatıb - Yenilənib

Azərbaycan Ordusunun xüsusi təyinatlıları Türkiyə Milli Müdafiə Nazirliyinin təşkilatçılığı ilə Kayseridə keçirilən “Erciyes-2023” hərbi təlimdə iştirak edib.

APA-nın Türkiyə müxbiri xəbər verir ki, 2 gün davam edən təlimdə 9 ölkədən 652 personal qatılıb, 354 növ texnika və silah növündən istifadə olunub.

Təlimlərdə həm gecə, həm də gündüz müəyyən olunmuş koordinatlarla paraşüt tullanışları həyata keçirilib, şərti düşmən məhv edilərək ərazinin təhlükəsizliyi təmin edilib.

***

“Report” xəbər verir ki, bu barədə Türkiyənin Milli Müdafiə Nazirliyindən bildirilib.

Qeyd olunub ki, təlimlərdə Azərbaycanla yanaşı, Gürcüstan, Pakistan, Liviya, İspaniya, İtaliya və Özbəkistan da müşahidəçi kimi təmsil olunub.

Təlimlədə 652 nəfərlik şəxsi heyət, 67 nəqliyyat vasitəsi, 5 təyyarə və 354 müxtəlif növ silahlardan istifadə olunub.

Qeyd edək ki, Azərbaycan Müdafiə Nazirliyi də sözügedən təlimlərlə bağlı məlumat yayıb.

Bildirilib ki, Azərbaycan Ordusunun hərbi qulluqçuları Türkiyənin Kayseri şəhərində keçirilən “Erciyes - 2023” təlimində iştirak ediblər. Azərbaycan Hərbi Dəniz Qüvvələrinin xüsusi təyinatlılarının cəlb olunduğu təlimdə qarşıya qoyulan tapşırıqlar uğurla yerinə yetirilib.

“Erciyes - 2023” təlimində əsas diqqət qarşılıqlı əlaqədə fəaliyyətlər zamanı döyüş uzlaşmasının təmin edilməsi, təcrübə mübadiləsi və peşəkarlığın artırılması, eləcə də hərbi qulluqçuların bilik və bacarıqlarının daha da təkmilləşdirilməsinə yönəldilib.

Poliqon.info