Türkiyə Prezident Administrasiyasındakı mənbə Ankaranın “taxıl sazişi” ilə bağlı alternativ danışıqlar aparmasını təkzib edib...
“Qərb mediasının yazdığı kimi, Türkiyə taxıl sazişi üzrə gizli danışıqlar aparmır, Ankaranın təşəbbüsləri və məqsədləri son dərəcə açıqdır".
Poliqon xəbər verir ki, bu barədə “RİA Novosti” Agentliyi Türkiyə Prezident Administrasiyasındakı mənbəyə istinadən yazıb.
Mənbə bir sıra Qərb mətbuat orqanının Ankaranın “taxıl sazişi” üzrə alternativ danışıqlar aparması ilə bağlı xəbərlərini şərh edib.
“Dünən Türkiyə prezidenti Nazirlər Kabinetinin iclasından sonra xalqa müraciətində bildirib ki, Ankara bütün tərəflərin gözləntilərini nəzərə alaraq taxıl sazişinin bərpası üzərində işləyir. Bizim təşəbbüslərimiz, məqsədlərimiz son dərəcə açıq və aydındır - ehtiyacı olan ölkələrdə ərzaq təhlükəsizliyinə yaranan təhlükənin qarşısını almaq. Başqa məqsədlərdə isə Türkiyə tərəfi yoxdur. Məqsədlərimizdən xəbərdar olan bütün tərəflərlə açıq, səmimi dialoq var. Bütün bu məlumatlar Türkiyənin səylərini neytrallaşdırmaq məqsədi daşıyır”, deyə mənbə bildirib.
Qeyd edək ki, “Taxıl sazişi” iyulun 18-də dayandırılıb. Rusiya Türkiyə, Ukrayna və BMT-nin müqavilənin uzadılması təklifinə mənfi cavab verib.
Poliqon.info