Putin: Rusiya Afrika ölkələrinə suverenliyinə kömək etməyə davam edəcək...

“Bu gün Afrika özünü inkişaf etməkdə olan çoxqütblü dünyanın qütblərindən biri kimi getdikcə daha inamla təsdiq edir”.

Poliqon xəbər verir ki, bu barədə Rusiya prezidenti Vladimir Putin Rusiya-Afrika İqtisadi və Humanitar Forumunun iştirakçılarına və qonaqlarına təbrikində bildirib. Müraciət çərşənbə günü, iyulun 26-da Kremlin saytında dərc olunub.

Putin qeyd edib ki, Rusiya Afrika qitəsi dövlətlərinin sosial-iqtisadi sabitlik və tərəqqi arzularını dəstəkləyir. O, son illər Rusiya ilə Afrika arasında əməkdaşlığın yeni səviyyəyə yüksəldiyini vurğulayıb. Moskva bunu daha da inkişaf etdirmək niyyətindədir.

“Və təbii ki, biz afrikalı tərəfdaşlarımıza onların milli və mədəni suverenliyinin möhkəmləndirilməsində hər cür köməklik göstərməyə davam edəcəyik”, deyə Rusiya lideri əlavə edib.

Putin həmçinin bu günlərin birində keçiriləcək forumun uzunmüddətli perspektivdə Rusiya ilə Afrika ölkələri arasında siyasi və humanitar əməkdaşlığa daha bir təkan verəcəyinə əminliyini ifadə edib.

Qeyd edək ki, ikinci Rusiya-Afrika sammiti iyulun 27-28-də Sankt-Peterburqda baş tutacaq.

Poliqon.info