Şoyqunun böyük yalanı və Kaxovka SES...

Poliqon Rusiya mətbuatına əsasən xəbər verir ki, Kreml təbliğatı Kaxovka SES-in bəndinin dağılmasının əhəmiyyətini azaltmağa başlayıb. Əgər bir gün əvvəl səhər federal kanallarda xəbər buraxılışları bu xəbərlə başlamışdısa, axşama yaxın ən böyük texnogen fəlakətlərdən biri əsas mövzu olmaqdan çıxdı. “Birinci Kanal” və “Rossiya 1”in son buraxılışlarında Xerson bölgəsində baş verənlər üçüncü dərəcəli xəbərə çevrildi, NTV-də isə Kaxovka haqqında reportaj ikinci olub.

“Birinci Kanal” və “Rossiya 1” telekanallarında son xəbər buraxılışları müdafiə naziri Sergey Şoyqunun Ukraynanın hücumunu dəf etmək barədə bəyanatı ilə başladı. Şoyqu bildirib ki, Ukrayna Silahlı Qüvvələrinin əks hücumu gedişində Rusiya qüvvələri düşmənə sarsıdıcı qələbə çalıb. Şoyqunun sözlərinə görə əks-hücumun başladığı 3 gün ərzində Ukrayna ordusu “3715-ə qədər hərbçi, 52 tank, 207 zirehli döyüş maşını, 134 avtomobil” itirib. Lakin Şoyqunun bu iddaları rus hərbi jurnalistlər tərəfindən belə ciddi qarşılanmayıb.

Rusiya Müdafiə Nazirliyinin Almaniyanın “Leopard” tanklarının məhv edilməsi ilə bağlı görüntülər təqdim edilib. Hətta Rusiya Müdafiə Nazirliyinə yaxınlığı ilə seçilən hərbi jurnalistlər belə bu görüntüləri gülünc adlandırıblar.

“Müdafiə Nazirliyinin yayımladığı videolarda çox güman ki, hərbi texnika yox, taxılyığan kombaynlar və traktorlar var idi”, deyə Rusiyanın populyar hərbi telegram kanalları “Voennıy osveromitel” və “Rıbar” kanalları yazıb. Açıq məlumatlara əsasən cəbhələrdə baş verənləri təhlil edən OSINT analitikləri də Ukrayna ordusunun belə əhəmiyyətli itkilərinin olmadığını bildirib.

Qeyd edək ki, Kaxovka Su Elektrik Stansiyasının bəndində partlayış çərşənbə axşamı gecə baş verib. On minlərlə insan su anbarının partladılması nəticəsində yaranan daşqın zonasında qalıb. Ukraynanın nəzarətində olan Dnepr çayının sağ sahilində 1,8 mindən çox evi su basıb, yerli hakimiyyət orqanları bildiriblər. Moskvanın təyin etdiyi səlahiyyətlilər, Rusiyanın nəzarət etdiyi sol sahildə 22-40 min adamın fəlakət zonasında olduğunu, ən azı 7 nəfərin itkin düşdüyünü bildirib. Sol sahildə 1,4 mindən çox, sağ sahildə isə 1,3 minə yaxın insan təxliyə edilib.

Çərşənbə günü səhər saatlarında Novaya Kaxovkada suyun səviyyəsi azalmağa başlayıb, Rusiyanın Novokaxovka rayon administrasiyasının rəhbəri Vladimir Leontyev bildirib. Onun sözlərinə görə, suyun səviyyəsi 35 santimetr aşağı düşüb. Ukraynanın Xerson vilayətinin administrasiyasının rəhbəri Aleksandr Prokudin isə öz növbəsində bildirib ki, növbəti gün suyun səviyyəsi daha bir metr qalxa bilər.

Poliqon.info