Böyük Britaniyanın yeni baş naziri sələfinin İsraildəki səfirliyi Yerusəlimə köçürmək qərarını ləğv edib...
Böyük Britaniyanın baş naziri Rişi Sunak sələfi Lizz Trassın İsraildəki Britaniya səfirliyini Yerusəlimə köçürmək qərarını ləğv edib.
“Biz bu məsələni araşdırdıq. Britaniya səfirliyinin köçürülməsi planı yoxdur”, deyə Baş nazirin ofisi Britaniya mediasına açıqlamasında bildirib.
PİA.az xəbər verir ki, təyinatından cəmi 45 gün sonra istefa verən Trass ABŞ-ın atdığı addımlara paralel olaraq səfirliyin Tel-Əvivdən Yerusəlimə köçürülməsi ehtimalını qiymətləndirmək üçün göstəriş vermişdi. Trass sentyabr ayında Birləşmiş Millətlər Təşkilatının Baş Assambleyasına getdiyi zaman bu barədə Nyu Yorkda İsrailin baş naziri Yair Lapidə məlumat vermişdi.
Qərarın yeni baş nazir Sunakın yəhudi-ərəb münasibətlərinin normallaşmasına dair “İbrahim razılaşmaları”nın ildönümü münasibəti ilə Yaxın Şərq diplomatları ilə görüşündən dərhal sonra verilməsi diqqət çəkib. Noyabrın 2-də keçirilən görüşdə Sunak deyib:
“Ənvər Sadatın Knessetdə çıxış etmək üçün İsrailə getməsindən təxminən 45 il keçir. “İbrahim razılaşmaları” ilə bizim nəsil məşəli götürdü. İndi biz bu səyahətə davam etməliyik. Biz nümayiş etdirməliyik ki, daha sıx əməkdaşlıq etməklə davamlı sülhə, sabitliyə və firavanlığa nail ola bilərik. Ən əsası, ümid verə bilərik”.
Fələstinin Böyük Britaniyadakı nümayəndəsi Husam Zumlut qərarı alqışlayıb:
“Böyük Britaniya hökumətinə, din liderlərinə, fəallara və bu məsələ ilə bağlı Böyük Britaniyanı beynəlxalq hüquqa riayət etməyə çağıran bütün vətəndaşlara təşəkkür edirik. Böyük Britaniya səfirliyinin harada yerləşməsi problemə çevrilməməli idi”.
Qeyd edək ki, Sunak avqust ayında “İsrailin Mühafizəkar Dostları” toplantısındakı çıxışında Yerusəlimi “İsrailin mübahisəsiz tarixi paytaxtı” kimi təsvir edib. Yerusəlimin paytaxt kimi tanınması üçün səy göstərəcəyini vəd edən Sunak, Mühafizəkarlar Partiyasının lideri və Baş nazir olacağı təqdirdə israillilərin təhlükəsizliyini ön planda tutacağını bildirmişdi.
pia.az