Türk Dövlətləri Təşkilatının dini liderlərinin Şuşada keçirilən görüşünün rəsmi hissəsi başa çatıb...
APA xəbər verir ki, Qafqaz Müsəlmanları İdarəsi sədrinin birinci müavini Salman Musayev Türk Dövlətləri Təşkilatının müsəlman dini liderləri şurasının Azərbaycan Respublikasının Prezidenti İlham Əliyevə təşəkkür mətnini oxuyub. Sonda isə Özbəkistan müftisi Nuriddin Xoliknazarov dualar oxuyaraq türk dövlətlərinin və İslam dünyasının birliyini arzulayıb.
***
Türk Dövlətləri Təşkilatının (TDT) müsəlman dini liderləri işğaldan azad olunmuş Şuşa şəhərindədir.
"Report"un Şuşaya ezam olunmuş əməkdaşının verdiyi xəbərə görə, bu gün Azərbaycanın mədəniyyət paytaxtında TDT Müsəlman Dini İdarə rəhbərləri Şurasının Əsasnaməsi imzalanacaq, birgə bəyanat qəbul ediləcək.
Daha sonra dini liderlər Şuşanın Yuxarı Gövhərağa məscidində birgə namaz qılacaqlar.
Nümayəndə heyəti Şuşada tarixi məkanlarla, həmçinin burada aparılan bərpa-quruculuq işləri ilə də tanış olacaqlar.
***
Türk Dövlətləri Təşkilatının (TDT) müsəlman dini liderlərinin Azərbaycanın işğaldan azad olunmuş ərazilərinə səfəri başlayıb.
"Report"un Füzuliyə ezam olunmuş əməkdaşının verdiyi xəbərə görə, nümayəndə heyəti əvvəlcə Füzuli Beynəlxalq Hava Limanı ilə tanış olublar.
Onlar erməni işğalından azad edilən Füzuli şəhərində dağıntılara baxıblar.
Daha sonra dini liderlər Füzulidən Şuşaya yola düşüblər.
pia.az