Kreml bu müharibəyə də girəcək?

Bu sözləri Axar.az-a İranın və Bəşər Əsədin müttəfiqi olan husilərin Vladimir Putinə rəsmi məktub göndərməsinə münasibət bildirən politoloq Əhəd Məmmədli deyib. O bildirib ki, məktubda Putindən Yəməndə gedən vətəndaş müharibəsinə müdaxilə edilməsini və bununla da "sülhə" nail olunmasını xahiş edirlər:

"Yəmən Osmanlının ən çiçəklənən əyalətlərindən sayılırdı. Bu ölkə çox strateji bir ərazidə yerləşir. Yəmən Qırmızı dənizdən Hind okeanına çıxışa malikdir. Rusiya üçün də Yəmən "doğmadır". Ötən əsrin ikinci yarısından SSRİ də Yəmən uğrunda savaşa başlayıb. Yəmən şimal və cənuba bölünəndə SSRİ hər ikisinə dəstək vermişdi. Adendə rusların hərbi bazası olub. Yəni maddi maraqlarına görə Putin Yəmən avantürasına qoşula bilər".

Politoloq qeyd edib ki, hazırda husilərin nəzarət etdiyi və onlar üçün çox böyük əhəmiyyət daşıyan, bütün yardımları aldıqları Xodeyda uğrunda ölüm-dirim savaşı gedir:

"Üç il Səudiyyə Ərəbistanı-BƏƏ koalisiyasının hücumlarını uğurla dəf edən və hətta hərdən Səudiyyə ərazisinə raket zərbələri endirən husilər məğlubiyyət astanasındadırlar. Xodeydanın aeroportu artıq koalisiya ordusunun əlindədir. Hazırda Xodeydada küçə döyüşləri gedir. Xodeyda təslim olsa, böyük ölçüdə Yəmən müharibəsinin taleyi həll ediləcək".

Politoloq vurğulayıb ki, husiləri, ələvilər kimi, Putin xilas edə bilər:

"Rusiya buna gedəcəkmi, bu supergücün eyni vaxtda həm siyasi, həm iqtisadi, həm də hərbi gücü bir neçə cəbhədə (Ukrayna, Suriya, Yəmən) vuruşmağa yetəcəkmi?! Mən düşünürəm ki, yetməyəcək. Rusiyada ildən-ilə narazılıq artmaqdadır. Hələlik Krım, Olimpiada, DÇ ilə Putin bu narazılığın qarşısını alır. Amma ortaya sual çıxır: nə vaxta qədər?!"

Politoloqun sözlərinə görə, Suriyadan fərqli olaraq, Yəməndə savaş tərəfləri bir-biri ilə barışığa daha tez gələ bilər:

"Çünki Yəmən husiləri, Suriya ələvilərindən fərqli olaraq, İrana həm ideoloji, həm siyasi, həm də maliyyə baxımından daha az bağlıdırlar. Koalisiya qüvvələri husilərin Yəməndə məhv edilməsini istəmir və bunu dəfələrlə bəyan ediblər. Səudiyyə Ərəbistanı-BƏƏ alyansı Yəməndə hakimiyyətin BMT tərəfindən tanınan Mansur Hadinin rəhbərliyi altında olan leqitim iqtidara qaytarılmasını istəyir. Əvəzində hakimiyyətdə husilərə də (bir neçə nazir portfeli) yer veriləcəyini söz verir. Düşünürəm, Yəmənin 25 faizini təmsil edən husilər üçün də ən optimal variant budur. Əksinə, Rusiya Yəmənə müdaxilə etsə, vəziyyət daha da gərginləşərək və Yaxın Şərqdə ikinci Suriya böhranı yaşanacaq. Bəlkə də yaşanır, sadəcə indi Yəmən müharibəsi Suriya müharibəsinin kölgəsi altında qalıb".

pia.az