Prokurorluq evə basqın edən şəxslərin hökmündən protest verdi

Bakı Apellyasiya Məhkəməsində keçiriləcək iclas iyulun 25-nə təyin edilib.

Şikayət hakim Elşad Şamayevin sədrliyi ilə araşdırılacaq.

Prokurorluq birinci instansiya məhkəməsinin çıxardığı hökmdən narazı qalıb. O, təqsirləndirilən şəxslərə daha ağır cəza verilməsini istəyir. Məhkumlar isə daha yüngül cəza tələb edirlər.

Qeyd edək ki, hadisə ötən il aprelin 26-da Nəsimi rayonu ərazisində baş verib. Dəstə üzvləri gecə saat 4 radələrində rayon sakini Səyyad Cəbiyevin mənzilinə aldatma yolu ilə girərək ev sahibinin başına dəmir parçası ilə xəsarət yetiriblər. Onlar evdə 50 min manat axtarsalar da, oradan içərisində 200 manat pul və sənədlər olan pulqabı aparıblar.

Nəsimi Rayon Polis İdarəsi və 19-cu Polis Bölməsi əməkdaşları tərəfindən həyata keçirilən əməliyyat-axtarış tədbirləri nəticəsində hadisəni törətməkdə şübhəli bilinənlər - Cəlil Quliyev, Elvin Salahov, Vüqar Qələndərov, Murad Səfərov, Əziz Əliyev, Vüsal Hüseynov və Gülər Bəxtiyarzadə tutulublar.

Onların barəsində oğurluq və quldurluq maddələri ilə ittiham irəli sürülüb.

Bakı Ağır Cinayətlər Məhkəməsinin hökmü ilə Cəlil Quliyev, Elvin Salahov və Vüqar Qələndərov 11 il, Gülər Bəxtiyarzadə, Əziz Əliyev və Vüsal Hüseynov 8 il, Murad Səfərov isə 3 il müddətinə azadlıqdan məhrum etmə cəzasına məhkum ediliblər.

pia.az