Əfsanəvi boksçu Məhəmməd Əlini məğlub edən keçmiş dünya çempionu Leon Spinks 67 yaşında xərçəng xəstəliyindən vəfat edib.
Novator.az saytı CNN kanalına istinadla xəbər verir ki, Leon Spinks prostat xərçəngi ilə 5 il savaşandan sonra keçinib.
COVİD-19 infeksiyası ilə bağlı qüvvədə olan bəzi qadağalara görə boksçu can verəndə yanında yalnız bir neçə doğması və dostu olub. Xanımı Brenda Qur son nəfəsinədək ərinin yanından çəkilməyib.
Leon Spinks 1953-cü ildə ABŞ-ın Missuri ştatında doğulub. 1976-cı ildə Kanadada keçirilən Olimpiya oyunlarında qızıl medal qazanıb.
Onun bioqrafiyasının ən yaddaqalan məqamlarından biri, sözsüz ki, 1978-ci ilin fevralında Məhəmməd Əlini məğlub etməsidir.
Leon Spinksin Məhəmməd Əli ilə qarşılaşması fevralın 15-də Nevada ştatının Las-Veqas şəhərində baş tutub. Rinqdə rəqibinə qalib gələn Spinks ağır çəkidə boks üzrə dünya çempionu tituluna layiq görülüb. Bu qələbə həm də Spinksin səkkizinci peşəkar qarşılaşması olduğundan döyüş boks tarixinə heyrətamiz bir hadisə kimi düşüb.
Lakin 7 ay ötəndən sonra Yeni Orleandakı “Superdoum” arenasında Spinks yenidən Əli ilə üz-üzə gəlməli olub. Bu dəfə Məhəmməd Əli ona qalib gələrək öz çempion titulunu geri qaytarıb.
İdmançı karyerasında Leon Spinks bir sıra rekordlara imza atıb. Məsələn, o, 14 dəfə nokautla qələbə qazanıb.
1995-ci ildə Leon Spinks boksla vidalaşıb.
Prostat xərçəngindən əziyyət çəkən Leon Spinks 2019-cu ilin dekabrından xəstəxanada yatırdı.
Leon Spinksin bioqrafı CNN kanalına belə deyib: “Leon bir çox xəstəliklə mübarizə aparsa da, heç vaxt dodağından gülüş əskik olmurdu. O, yekun qərarını verəndə həmişə əzm, iradə nümayiş etdirirdi və heç vaxt həqiqəti danmırdı”.
pia.az
Digərxəbərlər
Populyar xəbərlər
