Kadırov mayın 31-də iddia edib ki, çeçen qüvvələri yeni əmr alıb...
Rusiya Ukraynada hücum əməliyyatlarını davam etdirmək üçün "Vaqner" qüvvələrini Çeçenistan lideri Ramzan Kadırovun bölmələri ilə əvəz etməyə cəhd edə bilər.
Poliqon xəbər verir ki, bu barədə Müharibənin Tədqiqi İnstitutunun (ISW) yeni hesabatında deyilir.
Qeyd olunur ki, Rusiya hərbi komandanlığı ehtimal ki, "Vaqner" qüvvələrinin Baxmutdan çıxarılmasından sonra Çeçenistan Respublikasının başçısı Ramzan Kadırovun qüvvələrinə Ukraynada hücum əməliyyatlarına başlamağı əmr edib.
Kadırov mayın 31-də iddia edib ki, çeçen qüvvələri yeni əmr alıb və Donetsk vilayətinin cəbhə xəttində məsuliyyəti öz üzərinə götürüb. Kadırov həmçinin çeçen bölmələrinin “aktiv döyüş fəaliyyətinə” başlamalı və “bir sıra yaşayış məntəqələrini azad etməli” olduğunu iddia edib.
Onun sözlərinə görə, çeçen “Axmat” xüsusi təyinatlıları (Spetsnaz) və “Sever-Axmat” xüsusi təyinatlı alayı Marinka istiqamətinə keçib.
Kadırov qeyd edib ki, Rusiya hərbi komandanlığı Rusiya, Rosqvardiya (Rusiya Milli Qvardiyası) və Çeçen Axmat qüvvələrinə cəbhə xətti boyunca Zaporojya və Xerson vilayətlərində də hücum əməliyyatlarına başlamaq əmri verib.
Bir gün əvvəl bəzi KİV-lər Çeçenistan Respublikasının rəhbəri Ramzan Kadırovun Moskvaya pilotsuz təyyarə hücumuna görə qisas alacağını vəd etdiyi barədə məlumat yayıb.
Rusiya mətbuatının məlumatına görə, təxminən 25 pilotsuz təyyarə Moskva və Moskva vilayətinə hücum edib, onların əksəriyyəti Moskva vilayətində hava hücumundan müdafiə vasitələri tərəfindən vurulub, bəzi pilotsuz təyyarələr həddindən artıq alçaq hündürlükdə uçduqları üçün ağaclara və naqillərə ilişib. Üç pilotsuz təyyarə yaşayış binalarına çırpılıb, lakin onlardan biri partlayıcını işə salmayıb.
Poliqon.info