“Mühasibat uçotu haqqında” qanuna edilmiş dəyişikliklərə əsasən Dövlət İmtahan Mərkəzi tərəfindən “peşəkar mühasib sertifikatı” veriləcək
Bu barədə Dövlət İmtahan Mərkəzindən məlumat verilib. Məlumatda bildirirlir ki, qanunda nəzərdə tutulan məsələlərin icra edilməsi üçün DİM tərəfindən təkliflər paketinin hazırlanmasına, həmçinin digər aidiyyəti orqanlarla əməkdaşlıq üçün birgə müzakirələrə başlanılıb.
Qanunda nəzərdə tutulan məsələlərin icra edilməsi üçün DİM tərəfindən təkliflər paketinin hazırlanmasına, həmçinin digər aidiyyəti orqanlarla əməkdaşlıq üçün birgə müzakirələrə başlanılıb. Burada əsas məqsəd beynəlxalq standartlara uyğun olaraq müvafiq sahələrdə kadrların formalaşdırılması, peşəkarlıq səviyyəsinin yüksəldilməsi və yerli mütəxəssislərə mühasibatlıq üzrə sertifikatların verilməsidir. Xatırladaq ki, ictimai əhəmiyyətli qurumların, iri sahibkarlıq subyektlərinin, büdcə təşkilatlarının illik maliyyə hesabatlarını dərc edən şəxslərin baş mühasiblərinin peşəkar mühasiblər olması tələbi də qanunda öz əksini tapmışdır.
Sözügedən qanuna edilmiş dəyişikliklərə əsasən DİM-in təşkil etdiyi imtahandan müvəffəqiyyətlə keçənlərə “Peşəkar mühasib” səviyyəsinə uyğunluğunu təsdiq edən sənəd – sertifikat veriləcək. Forması DİM tərəfindən müəyyən olunacaq peşəkar mühasib sertifikatının qüvvədə olma müddəti beş il olacaq. Peşəkar mühasib kimi fəaliyyətini davam etdirmək istəyən şəxslər sertifikatının qüvvədə olma müddətinin son ilində növbəti sertifikatı almaq üçün DİM tərəfindən keçirilən imtahanlarda iştirak etməli və yenidən peşəkar mühasib sertifikatı almalıdırlar.
Peşəkar mühasib sertifikatı alaraq fəaliyyətə başlayan şəxs sonradan eyni standart üzrə iki dəfə sertifikat aldıqda, sonuncu sertifikat şəxsə ömürlük verilir və həmin şəxs sertifikatda qeyd olunan standart üzrə peşəkar mühasib kimi fəaliyyətini davam etdirməsi üçün hər hansı imtahana cəlb olunmur.
pia.az