Çin Rusiyaya silah tədarük edə bilər? - Ağ Evin şərhi...

Poliqon xəbər verir ki, bunu Ağ Evin milli təhlükəsizlik sözçüsü Con Kirbi G7 sammiti ərəfəsində Makkeyn İnstitutunda müzakirələr zamanı deyib.

ABŞ Rusiya Federasiyasına hərbi dəstəyin Çinin maraqlarına uyğun olmadığına əmindir:

“Biz çinlilərin Rusiya silahlı qüvvələrini öldürücü vasitələrlə təmin etmək üçün belə bir addım atdığını görməmişik... Bunun Çinin maraqlarına uyğun olduğuna inanmırıq”, deyə Kirbi bildirib.

Ağ Evin milli təhlükəsizlik sözçüsünün sözlərinə görə, ABŞ Çinlə münaqişəyə can atmır, çünki münasibətlərdə bu gərginliyin hər hansı başqa formada inkişaf etməsi üçün heç bir səbəb yoxdur. Kirbi əlavə edib ki, buna görə də Vaşinqton Pekinlə kommunikasiya xətlərini açıq saxlamaq istəyir: “Biz komandaları yenidən bir araya gətirmək istəyirik...”.

Qeyd edək ki, mütəmadi olaraq Çinin Ukraynaya qarşı müharibə üçün Rusiya Federasiyasını silahla təmin etdiyi barədə xəbərlər yayılır. Eyni zamanda, Pekin belə bəyanatları təkzib edir.

Bu ilin fevralında CNN yazıb ki, Çin ikili oyun oynayır və Rusiyaya öldürücü silahlar ötürməyi planlaşdırır. Politico-nun məlumatına görə, Çin şirkətləri ruslara 1000 avtomat və digər texnika göndərib.

Martın 21-də isə məlumat verilib ki, tammiqyaslı müharibə başlayandan bəri Çin Xalq Respublikası Moskvaya dəyəri 12 milyon dollardan çox olan dron göndərib.

Poliqon.info