Rusiya Fələstin və Suriyadan muzdlu əsgərlər toplayır

Poliqon.info xəbər verir ki, Livan kəşfiyyat xidmətlərindən olan mənbənin The Media Line nəşrinə verdiyi məlumata görə, ruslar Fələstin və Suriyada muzdluları 350 dollara “satın almağa” çalışır.

Məhz döyüş təcrübəsi olan insanlar ayda 350 dollara Ukraynada Rusiya üçün döyüşmək təklif olunur. Üstəlik muzdluların PUA-ları idarə etmək bacarığı və şəhərlərdə partizan müharibəsi təcrübəsi də olmalıdır.

The Media Line nəşri bir sıra Rusiya təşkilatlarının Fələstində adam toplamaqla məşğul olduğunu, Fələstin Milli Administrasiyasının Livandakı nümayəndəliyi ilə əlaqə saxladığını vurğulayıb. Həmçinin Rusiya “çirkli” biznesi üçün Livanın “Hizbullah” radikal qruplaşmasının kuratorlarından istifadə edir.

Məlumata əsasən Livanda Sidon liman şəhərinin cənubundakı Eyn əl-Xalva ərazisində yaşayan fələstinli qaçqınların bəzilərini artıq Ukraynaya yola salıblar.

Nəşrin mənbəsi bildirir ki, muzdlular əvvəlcədən hazırlıq keçmədən, demək olar ki, dərhal cəbhə xəttinə göndərilir. Belə “könüllülər”dən ruslar artıq 300 nəfəri toplayıb və daha 100-ə yaxın adam da Ukraynada vuruşmağa razılıq verib.

Rusiya həmçinin Suriyanın müxtəlif bölgələrində Ukraynadakı müharibə üçün “könüllülər” axtarır. Orada isə bu işlə “Vaqner qrupu” məşğul olur. Bundan əlavə, Kreml Suriya nizami qoşunlarında xidmət göstərənlərə Ukraynada vuruşmaq üçün onlara ayda 500-700 dollar vəd edir.

Poliqon.info