Ermənistan silahlı qüvvələrinin bölmələri Azərbaycan Ordusunun Naxçıvan mövqelərini bir neçə dəfə atıcı silahlardan atəşə tutub...
Məhəmməd Əsədullazadə: “Ermənistan ordusunun Naxçıvan istiqamətində atəşkəsi pozması hökumətin sülh planına qarşı olanların işidir”.
“30 ildir ki, Ermənistan ordusunda generalitet Rusiya Hərbi Kəşfiyyatı ilə sıx bağlıdır. Proseslər göstərir ki, Ermənistan ordusunun Baş Qərargahı Nikol Paşinyanın sülh planına qarşıdır və hökumətin Azərbaycanla normal əlaqələr siyasətini dəstəkləmir”.
Bu sözləri politoloq Məhəmməd Əsədullazadə Ermənistan silahlı qüvvələrinin Naxçıvan istiqamətində təxribatlar törətməsini Poliqon-a şərh edərkən qeyd edib.
Bildiyimiz kimi, Ermənistan silahlı qüvvələrinin bölmələri Azərbaycan Ordusunun Naxçıvan Muxtar Respublikasının Şərur rayonunun Havuş, Ordubad rayonunun Nürgüt, Şahbuz rayonunun Güney Qışlaq yaşayış məntəqələri istiqamətlərində yerləşən mövqelərini bir neçə dəfə atıcı silahlardan atəşə tutub.
Uzun müddətdir davam edən nisbi sakitlikdən sonra Ermənistanın vəziyyəti gərginləşdirməkdə məqsədi nə ola bilər?
Mövzunu Poliqon-un əməkdaşı Cənubi Qafqaz Təhlükəsizlik və Sülh İnstitutunun sədri, politoloq Məhəmməd Əsədullazdə ilə müzakirə edib.
Məhəmməd Əsədullazadə: “Azərbaycanla Ermənistan arasında sülh danışıqları kövrəkdir və Nikol Paşinyanın təhlükəsizliyi tam təmin ediləcəksə, sülhə imza atacaq”.
Nikol Paşinyan həm Kilsə, həm də orduda təmizlik aparmasa, bu qüvvələrin birləşib, Ermənistanda təxribatlara əl atacaqlarını proqnoz edən politoloq əlavə edib ki, Azərbaycanla sülh müqaviləsinin bağlanmasının qarşısını almağa çalışacaqlar:
“Ermənistan ordusunun Naxçıvan istiqamətində atəşkəsi pozması hökumətin sülh planına qarşıdır. Ermənistan ordusu Naxçıvanla sərhəddə iki gündür atəşkəsi mütəmadi pozur. Ötən gün Baş nazir Nikol Paşinyan sülh mətnin hazır olduğunu və bir ay ərzində sazişin bağlana biləcəyini qeyd etdi. Səhərisi Ermənistan silahlı qüvvələri sərhəddə təxribatlara əl atdı. Görünür, Ermənistan ordusunda sülhə qarşı olan qüvvələr var. Baş nazir orduda revanşist qurupu zərərləşdirə bilmir.
Ümumiyyətlə, 30 ildir ki, Ermənistan ordusunda generalitet Rusiya Hərbi Kəşfiyyatı ilə sıx bağlıdır. Proseslər göstərir ki, Ermənistan ordusunun Baş Qərargahı Nikol Paşinyanın sülh planına qarşıdır və hökumətin Azərbaycanla normal əlaqələr siyasətini dəstəkləmir. Bu qüvvələr təlimatı Rusiya Hərbi Baş Kəşfiyyatindan təlimatlar alır və 30 il ərzində Azərbaycana qarşi işğalın arxasında hansı qüvvənin olduğu məlumdur. Həmin “qüvvədir” ki, Nikol Paşinyan sülhdən danışanda silahlar Azərbaycana qarşı işə düşür.
Nikol Paşinyan həm Kilsə, həm də orduda təmizlik aparmasa, bu qüvvələr birləşib, Ermənistanda təxribatlara əl atacaqlar. Azərbaycanla sülh müqaviləsinin bağlanmasının qarşısını almağa çalışacaqlar. ABŞ Ermənistan da gedən prosesləri görür. Ona görə də hər həftə rəsmilər Yerevana səfər edir. Azərbaycanla Ermənistan arasında sülh danışıqları kövrəkdir və Nikol Paşinyanın təhlükəsizliyi tam təmin ediləcəksə, sülhə imza atacaq”.
Nərminə UMUDLU
Poliqon.info