Tramp dəlduzluq işinə etiraqz üçün 175 milyon dollar girov qoyub

ABŞ-ın keçmiş prezidenti Donald Tramp Nyu-York məhkəməsinin fırıldaqçılıq işi üzrə qərara etiraz etmək üçün 175 milyon dollar məbləğində girov ödəyib.

Poliqon xəbər verir ki, bu məlumatı ABC telekanalı aprelin 2-də məhkəmə sənədlərinə istinadən yayıb. Milyarder girovu “Knight Specialty” sığorta şirkəti vasitəsilə təmin edib.

2024-cü il fevralın 16-da məhkəmə Trampı “Trump Organization” şirkətinin aktivlərinin qiymətləndirilməsi ilə bağlı dələduzluqda təqsirli bilib. Nəticədə o, təqribən 355 milyon dollar ödəməli olub. Beləliklə, ümumi cərimə faizlərlə birlikdə 454 milyon dollar təşkil edib.

Bundan başqa siyasətçiyə üç il müddətində Nyu-York ştatında hər hansı korporasiyada məmur və ya direktor vəzifələrində işləmək və bu ştatda qeydiyyatdan keçmiş hər hansı maliyyə institutundan kredit götürmək qadağan edilib. Buna cavab olaraq Amerika dövlətinin keçmiş başçısı apellyasiya şikayəti verib. Trampın iş üzrə qərardan şikayət etmək üçün girov ödəməyə razı olmasından sonra Nyu York məhkəməsi prosesi aprelin 15-nə təyin edib.

“Trump Organization”a qarşı iddia 2022-ci ilin sentyabrında açılıb. Prokurorluğun məlumatına görə, şirkət öz aktivlərinin dəyəri barədə yanlış məlumat verərək, onların qiymətini 2,23 milyard dollardan 3,6 milyard dollara şişirdib.Təşkilat bu addımları kreditlərin verilməsi və sığorta üçün daha əlverişli şərtlər əldə etmək məqsədilə atıb.

Prokurorlar Trampın Floridadakı mülkünün, Manhettendəki Trump Tower göydələnindəki mənzilinin, həmçinin bəzi ofis binalarının və qolf meydançalarının dəyərinin şişirdildiyini iddia ediblər. Müdafiə tərəfinin sözlərinə görə, bütün ittihamlar əsassızdır və obyektin qiyməti obyektiv şəraitə görə dəyişə bilər.

Poliqon.info