Bayden Demokrat Partiyasının donorlarına deyib ki, İsrail dünya səviyyəsində dəstəyini itirir...
ABŞ prezidenti Co Bayden hesab edir ki, İsrail yəhudi dövlətinin HƏMAS radikal qruplaşmasına qarşı davam edən müharibəsində qlobal dəstəyi itirir.
Poliqon xəbər verir ki, bu barədə Fox News telekanalı məlumat yayıb. Telekanalın məlumatına görə, dövlət başçısı bu barədə çərşənbə axşamı təşviqat kampaniyası zamanı sponsorlara bildirib.
Bayden İsrailin Baş naziri Benyamin Netanyahuya istinad edərək, “Bibi çətin qərarlar verməlidir”, deyib.
Amerika prezidenti həmçinin vurğulayıb ki, İsrail “tarixdə ən mühafizəkar hökumətə” malikdir və “iki dövlətli həlli istəmir”. Baydenin nöqteyi-nəzərindən, “İsrailə qarşı münasibətdə qlobal dəyişikliyin” qarşısını almaq üçün Netanyahu “özünü gücləndirməli və dəyişməlidir”.
“Görüləcək çox şey var və biz İsraili güclü şəkildə dəstəkləməli olacağıq” deyə Bayden əlavə edib.
Qeyd edək ki, Baş naziri Benyamin Netanyahu bildirib ki, İsrail hakimiyyəti Qəzzada quru əməliyyatı keçirmək məsələsində amerikalı tərəfdaşlarından tam dəstək alıb.
“Mən HƏMAS-ın məhv edilməsində və girovlarımızın qaytarılmasında Amerikanın dəstəyini çox yüksək qiymətləndirirəm. Co Bayden və komandası ilə intensiv ünsiyyətdən sonra biz quru əməliyyatı və müharibəni bitirmək üçün beynəlxalq təzyiqin yumşaldılması üçün tam dəstək aldıq”, deyə Netanyahu bildirib.
Poliqon.info