Bir çox ölkələr Ərdoğanın təşəbbüsünü dəstəkləyib

Poliqon xəbər verir ki, bu barədə “RİA Novosti” Agentliyi Türkiyədəki diplomatik mənbəyə istinadən məlumat yayıb.

Qeyd edək ki, oktyabrın 7-də Fələstinin Həmas qruplaşması İsrailə qarşı kütləvi hücuma keçərək, sərhədyanı qəsəbələrə daxil olub və mülki insanları girov götürüb. Buna cavab olaraq İsrail müharibə vəziyyətinə keçdiyini və Qəzza zolağına qarşı cavab əməliyyatına başladığını elan edib. Hərbi əməliyyatlar hələ də davam edir . Təl-Əviv Qəzza zolağında quru əməliyyatı keçirməyi planlaşdırır.

Türkiyə sülh danışıqlarına ehtiyac olduğunu və Fələstinə qarant ölkə kimi çıxış etməyə hazır olduğunu bildirib. Türkiyə lideri Rəcəb Tayyib Ərdoğan Fələstin-İsrail nizamlanması üzrə sülh konfransının çağırılmasını təklif edib.

“Bu gün bir sıra ölkələrdən, əsasən də regional ölkələrdən bu təşəbbüsə dəstək var, lakin konfransın konkret tarixi və yeri barədə danışmaq hələ tezdir”, deyə türk diplomatik mənbə bildirib.

Qeyd edək ki, bundan əvvəl Qahirədə Fələstin problemi ilə bağlı sammit keçirilib. Burada 30-dan çox dövlət, bir sıra beynəlxalq və regional təşkilatlar iştirak edib.

Poliqon.info