Azərbaycan-İran dövlət komissiyalarının iclası... - Bakı-Tehran münasibətləri normallaşır?

Politoloq: “İran-Azərbaycan siyasi əlaqələrində böhran həmişə məhz Tehran rejiminin qeyri-konstruktiv və paniranist siyasətindən ortaya çıxır”.

“İran məcbur qalıb əlaqələri bərpa etməyə çalışır. Çünki baş verənlər İranın öz əleyhinə işlədi”.

Bu sözləri politoloq Məhəmməd Əsədullazadə Azərbaycan-İran İqtisadi Əməkdaşlıq dövlət komissiyasının iclasının keçirilməsini Poliqon-a şərh edərkən qeyd edib.

Xəbər verdiyimiz kimi dünən İran Astarasında Azərbaycan-İran İqtisadi Əməkdaşlıq dövlət komissiyasının iclası keçirilib. Yaşanan bu məlum gərginliklərdən və İran xarici işlər nazirinin Bakıya səfərindən sonra baş tutan bu iclas iki ölkə arasında münasibətlərin normallaşmasından xəbər verirmi?

İran-Azərbaycan münasibətlərinin indiki mərhələsini Poliqon-un əməkdaşı Cənubi Qafqaz Təhlükəsizlik və Sülh İnstitutunun sədri, politoloq Məhəmməd Əsədullazadə ilə müzakirə edib.

Məhəmməd Əsədullazadə: “Tehrana etibar etmək olmaz. Tehran yenidən düşmən siyasətini biruzə verə bilər”.

İran rejimi ticari və iqtisadi əlaqələri önə çəkərək əldə olunmuş iqtisadi layihələrin həyata keçirilməsi üçün addımların atılmasını irəli sürdüyünü nəzərə çatdıran politoloq Poliqon-a açıqlamasında qeyd edib ki, Astarada keçirilən görüşdə bu məsələlər müzakirə edilib:

“İran-Azərbaycan siyasi əlaqələrində böhran həmişə məhz Tehran rejiminin qeyri-konstruktiv və paniranist siyasətindən ortaya çıxıb. Azərbaycana qarşı düşmən siyasəti əsasən ölkəmizin ərazi bütövlüyünü təmin etməsindən sonra açıq müstəviyə keçdi. İki il davam edən bu böhran Tehran tərəfindən idarə edilir və Azərbaycan bu təhdidlər qarşısında geri çevrilmədi.

Nəticədə İran geri addım atdı. Bu Azərbaycanın İran üzərində siyasi qələbəsidir. İran məcbur qalıb əlaqələri bərpa etməyə çalışır. Çünki baş verənlər İranın öz əleyhinə işlədi. Tehran rejimi hesab edirdi ki, Azərbaycan geri addım atacaq. Amma, bu baş vermədi.

İran rejimi ticari və iqtisadi əlaqələri önə çəkərək əldə olunmuş iqtisadi layihələrin həyata keçirilməsi üçün addımlar atılmasını irəli sürdü. Astarada keçirilən görüşdə bu məsələlər müzakirə edilib. İqtisadi əlaqələr inkişaf edəcək. Bu İran- Azərbaycan əlaqələrinin normallaşması deməkdir. Amma, gərginlik ötməyib. Tehrana etibar etmək olmaz. Tehran yenidən düşmən siyasətini biruzə verə bilər”.

Nərminə UMUDLU
Poliqon.info