Yaponiyada NATO-nun ofisi açılacaq...

Rusiyanın Ukraynaya müdaxiləsi Yaponiya hakimiyyətini regionda təhlükəsizliyə münasibətini yenidən nəzərdən keçirməyə və NATO ilə əməkdaşlıq ofisinin açılması ilə bağlı danışıqlara başlamağa məcbur edib.

Poliqon xəbər verir ki, bunu Yaponiyanın xarici işlər naziri Yoşimasa Hayaşi CNN telekanalına bildirib.

“Bunu müzakirə etməyimizin səbəbi Rusiyanın Ukraynaya təcavüzündən sonra dünyanın daha qeyri-sabit olmasıdır”, deyə nazir kanala bildirib. Yoşimasa Hayaşinin sözlərinə görə, Şərqi Avropada baş verən hadisələr Asiya-Sakit Okean regionuna birbaşa təsir edir və bu, hərbi blokla əməkdaşlığı getdikcə vacib edir.

Nazir vurğulayıb ki, Yaponiya alyansın üzvü deyil. Bununla belə, danışıqlar Asiya-Sakit Okean regionunda NATO tərəfdaşlarının alyansla sabit əlaqələrə malik olduğuna işarə edir. “Eyni zamanda, ofisin açılması konkret ölkələrə mesaj kimi qəbul edilməməlidir”, deyə Yaponiyanın XİN rəhbəri qeyd edib.

Yaponiyanın Nikkei Asia nəşri mənbələrə istinadən yazıb ki, Tokioda açılacaq NATO ofisi Yaponiyaya Cənubi Koreya, Avstraliya və Yeni Zelandiya kimi regiondakı alyans tərəfdaşları ilə təhlükəsizlik məsləhətləşmələri aparmağa imkan verəcək.

Qeyd edək ki, oşar ofislər artıq Gürcüstan, Ukrayna, Bosniya və Herseqovina, Moldova və Küveytdə mövcuddur.

CNN-in Yaponiyada əlaqə ofisinin açılması planları ilə bağlı sualına NATO sözçüsü müttəfiqlərlə cari müzakirələrin təfərrüatlarına varmayacağını bildirib, lakin təşkilatın Tokio ilə uzunmüddətli əməkdaşlığını vurğulayıb.

Poliqon.info