Alman naziri Çini qınadı, XİN başçısı cavab verə bilmədi - Video

"Çin Ukraynadakı müharibə iştirakçılarının heç birinə silah vermək niyyətində deyil".

Poliqon xəbər verir ki, bunu Çinin xarici işlər naziri Qin Gang almaniyalı həmkarı Annalena Burbok ilə birgə mətbuat konfransında deyib.

"Hərbi məhsulların ixracı ilə bağlı Çin ağlabatan və məsuliyyətli mövqe tutur. Çin münaqişənin müvafiq tərəflərinə silah tədarük etməyəcək, həmçinin qanun və qaydalara uyğun olaraq ikili təyinatlı malların ixracını idarə edəcək, onları nəzarətdə saxlayacaq", deyə XİN şefi bildirib.

Beləliklə, Qin Gang Rusiyaya silah tədarük planlarını açıq şəkildə inkar edən ən yüksək çinli məmuru olub. Bundan əlavə, nazir bir daha Pekinin münaqişənin sülh yolu ilə həllinə kömək etməyə hazır olduğunu bəyan edib.

Qin Gangdan sonra çıxış edən Almaniyanın xarici işlər naziri Annalena Burbok Çini Rusiyanın işğalını birbaşa məsul tutmaq istəmədiyinə görə qınayıb.

“Düzünü deməliyəm ki, görəsən niyə Çinin mövqeyində işğalçı Rusiyaya müharibəni dayandırmaq çağırışı daxil deyil?", deyə Annalena Burbok Çin Xarici İşlər Nazirliyinin rəhbərinin yanında dayanaraq deyib. Qarşı tərəf bu ifadəyə heç bir reaksiya verməyib.

Qeyd edək ki, Rusiyanın Ukraynaya genişmiqyaslı müharibəsi başlayandan bəri Çin münaqişədə neytrallığını bəyan edib və danışıqlar yolu ilə həll yolunu tapmağı təklif edir. Eyni zamanda, Pekin mülki obyektlərə və mülki şəxslərə zərbələrin qəbuledilməz olduğunu qeyd etsə də, hərbi işğal faktını heç vaxt pisləməyib.

Ötən il ərzində mətbuatda Çinin Rusiyaya silah tədarük etməyi planlaşdırdığı və ya artıq başladığı barədə xəbərlər yayılıb. Qərb rəsmiləri yalnız yanvar ayında Çinin Rusiyaya tədarükünün təhlükəsi barədə danışmışdılar.

Bu yaxınlarda sızan gizli Pentaqonun sənədləri göstərir ki, Çin artıq silah satışını təsdiqləyib.

Poliqon.info