Banklarla əhali arasında məhkəmə çəkişmələri keçən il rekord həddə çatıb...
Bank üzrə mütəxəssis: “Hər bir halda Azərbaycan kimi balaca ölkə üçün problemli kreditlərin həcmi çoxdur”.
“Bu il orta səviyyəli və kiçik banklar üçün problemli kreditlər çox ağır ola bilər. Çünki onların vəsaitləri qayıtmır. Bu da onların maliyyə vəziyyətlərinə pis təsir edə bilər”.
Bu sözləri bank üzrə mütəxəssis Əkrəm Həsənov problemli kreditlərin həcmini PİA.az-a şərh edərkən qeyd edib.
Azərbaycanda banklarla əhali arasında məhkəmə çəkişmələri keçən il rekord həddə çatıb. Bu ildə məhkəmə çəkişmələrinin artacağı gözlənilir. Digər tərəfdən Mərkəzi Bankın yaydığı məlumatlarda problemli kreditlərin azaldığı qeyd olunur.
Müştəriləri ilə banklar arasında məhkəmə çəkişmələrinin artmasını nəylə əlaqələndirmək olar və hazırda Azərbaycan banklarının problemli kreditlərlə bağlı vəziyyətini necə dəyərləndirmək olar?
Bankların problemli kreditlər məsələsini PİA.az-ın əməkdaşı bank üzrə mütəxəssis Əkrəm Həsənov ilə müzakirə edib.
Əkrəm Həsənov: “Tək əhalinin deyil, sahibkarların da problemli kreditləri çoxdur. Amma əvvəlki illərə baxanda problemli kreditlərin azaldığını demək olar”.
Problemli kreditlərin yenidən artacağıni istisna etməyən mütəxəssis PİA.az-a bildirib ki, qiymət artımı və digər sosial problemlər vətəndaşlara kreditlərin qaytarılmasında problemlər yaradır:
“Mən vəkil kimi deyə bilərəm ki, mənə və həmkarlarıma problemli kreditlərlə bağlı müraciətlərin sayı azalıb. Xatırladım ki, ötən ayı sonu Mərkəzi Bankın sədri ilə ölkənin aparıcı iqtisadçı-ekspertinin görüşü oldu. Mən də bu görüşdə iştirak etdim. Mən orada bu sualı qaldırdım ki, Mərkəzi Bank problemli kreditlərin həcminin azalmasını deyir, bu kreditlərin əksəriyyəti qaytarılıb, yoxsa batıb? Bu barədə heç bir statistika yoxdur. Mərkəzi Bankın sədri də, işçiləri də dedilər problemli kreditlərin əksər hissəsi qaytarılıb. Eyni zamanda dedilər bununla bağlı statistika daha ətraflı olacaq.
Təbii ki, problemli kreditlər var və onlar yenə də çoxdur. Hər bir halda Azərbaycan kimi balaca ölkə üçün problemli kreditlərin həcmi çoxdur. Tək əhalinin deyil, sahibkarların da problemli kreditləri çoxdur. Amma əvvəlki illərə baxanda problemli kreditlərin azaldığını demək olar. Aydın məsələdir ki, problemli kreditlərin azalması bankların vəziyyətinin qismən yaxşılaşmasına səbəb olub. Amma bir sıra banklarda biznes kreditləri var ki, onların da məbləği çox böyükdür. Məhkəmə işlərinin də illərlə getməsi o bankların vəziyyətinə mənfi təsir göstərə bilər.
Əkrəm Həsənov: “Vəkil kimi deyə bilərəm ki, mənə və həmkarlarıma problemli kreditlərlə bağlı müraciətlərin sayı azalıb”.
Bu baxımdan bu il orta səviyyəli və kiçik banklar üçün problemli kreditlər çox ağır ola bilər. Çünki onların vəsaitləri qayıtmır. Bu da onların maliyyə vəziyyətlərinə pis təsir edə bilər. Lakin əksər banklarda belə problemlər yoxdur. Çünki onların maliyyə imkanları, xüsusən də iri banklarda maliyyə imkanları kifayət qədərdir. Eyni zamanda onlar müxtəlif alətlərdən, o cümlədən inzibati alətlərdən də istifadə edib öz problemli kredit məsələlərini həll edə bilərlər.
Problemli kreditlər baxımından 2015-2020-ci illər daha ağır illər oldu. İndi vəziyyət qismən düzəlir. Amma eyni zamanda problemli kreditlərin yenidən artacağı da istisna deyil. Çünki qiymət artımı və digər sosial problemlər vətəndaşlara kreditlərin qaytarılmasında problemlər yarada bilər. Onu da qeyd edim ki, bu hal baş versə belə, əvvəlki vəziyyət kimi olacağını gözləmirəm”.
Nərminə UMUDLU
pia.az