Ermənistanda general Manvel Qriqoryanın həbs olunması tələbilə keçirilən aksiya bir az əvvəl dayandırılıb
Erməni mediası xəbər verir ki, etirazçılar hava limanına gedən yolu açıblar, ancaq bəyan ediblər ki, növbəti aksiya yanvarın 14-də, Apelyasiya məhkəməsinin qarşısında keçiriləcək.
Etiraz aksiyasının iştirakçıları ilə bir neçə saat çəkən danışıqlardan sonra mərkəzi yolu açmaq mümkün olub. Polislə qarşıdurma yaransa da, etirazçılar tələblərindən geri çəkilməyib. Ancaq “Mənim addımım” blokundan olan deputat Ayk Sarkisyanın aksiyaçılarla uzun çəkən danışığından sonra yolda hərəkətin bərpası mümkün olub.
Etirazçılar cinayətkar saydıqları erməni generalın həbsxanaya qaytaılmasınadək tələblərində israrlı olacaqlarını deyiblər. Qeyd edək ki, M.Qriqoryan İrəvan məhkəməsinin qərarı ilə 21 dekabr 2018-ci ildə girov qarşılığında həbsdən azad olunub, bu da etirazlara səbəb olub. Baş Prokurorluq da öz növbəsində apelyasiya şikayəti verib. Qriqoryan külli miqdarda silah saxlamaqda və mənimsəmədə ittiham olunur. (Musavat.com)
pia.az