Bakıda sabiq MTN işçisinə qarşı külli miqdarda dələduzluq etməkdə ittiham edilən şəxs hakim qarşısına çıxarılıb
Məhkəmə proseslərində məlum olub ki, dələduzluqda ittiham edilən şəxs Azərbaycanda yüksək vəzifəli məmurlarla əlaqələrinin, qohumluğunun olduğunu deyərək müxtəlif şəxslərə qarşı da dələduzluq edib.
Bakı Ağır Cinayətlər Məhkəməsində külli miqdarda dələduzluqda ittiham edilən Azad Əliyevin cinayət işi üzrə məhkəmə iclası keçirilib.
Hakim Zeynal Ağayevin sədrliyi ilə keçirilən məhkəmə iclasında məlum olub ki, təqsirləndirilən Azad Əliyevin vəkili Tahir Xanalıyev prosesdə iştirak etmir. Hakim bildirib ki, vəkil artıq üçüncü dəfədir ki, üzürsüz səbəbdən məhkəmə prosesinə gəlmir. Vəkilin intizamsız davranışları ilə bağlı Vəkillər Kollegiyasına məktub göndərilməsi ilə bağlı katibə göstəriş verən hakim həmin məktubda kollegiya rəhbərliyindən vəkillin davranışları ilə bağlı tədbir görülməsini istəyib.
Təqsirləndirilən Azad Əliyev isə vəkilinin prosesə gəlməməsinin səbəbini bilmədiyini deyib.
Məhkəmə prosesində zərərçəkmiş şəxs olan sabiq MTN zabiti Faiq Muxtarov da iştirak edib. O da məhkəmənin üzrsüz səbəblərdən uzadılmasına narazılıq bildirib.
Məhkəmə iclası növbəti dəfə təxirə salınıb.
İttihamda yazılır ki, Azad Əliyev Faiq Muxtarovun etibarından sui-istifadə edərək biznes qurmaq, işə düzəltmək və müxtəlif vədlərlə külli miqdarda pul alıb. Ittihama görə, Azad Əliyev universitetə adam qəbul etdirmək, işə düzəltmək, biznes qurmaq adı ilə daha 5 nəfərə qarşı dələduzluq edib.
Elan edilmiş ittihamla Azad Əliyev özünü qismən təqsirli bilib. O deyib ki, digər şəxslərlə iş görmək adı ilə razılaşsa da sonradan iş alınmayıb. Aldığı borcları da qaytara bilməyib. Amma sonradan onlarla razılığa gəlib. Azad Əliyev yalnız Faiq Muxtarovla bağlı ittihamı qəbul etməyib. O bildirib ki, nə olursa, olsun, bunu qəbul etməyəcək.
A.Əliyev deyib ki, o da Faiq Muxtarovu məhkəməyə verib: “Faiqlə şərikli biznes işi görəcəkdik. Onun özü MTN işçisi olub. Mən guya onu MTN-ə işə düzəltmək adı ilə pul almışam. Sonra da bir neçə dəfə iş görmək adı ilə pul verib. Əgər bir dəfə veribsə, işini görməmişəmsə, ikinci, üçüncü dəfə niyə verirdi?
Faiq məndən 230 min pul alıb. Həmin pulu ona görə verdim ki, Faiqin gətirdiyi malların rüsumunu ödəmək lazım idi. Əgər deyildiyi kimi, mən Faiqdən 400 min alsaydım, burada olmazdım.
Faiq deyir ki, guya mən ondan vəzifəli şəxslərə vermək üçün rüşvət almışam. Mənim öz şirkətimə 20 milyonluq mal gəlirdi. Mən bu qədər işin içində gedib Faiqdən 10 mini niyə almalı idim? Guya aldığım pulu MTN-ə rüşvət kimi verəcəkdim. Axı bu necə ola bilər? Camaat iş görəndə MTN-dən qaçırdı ki, gözə görsənməsin. Mən dəli idim ki, iş görüm, sonra da aparım pulu MTN-ə verib gözə girim? Mən mülki qaydada Faiq Muxtarovu məhkəməyə vermişəm. Bu ayın 17-də məhkəmənin hökmü çıxacaq”.
Faiq Muxtarov isə Azad Əliyevin dediklərinin yalan olduğunu söyləyir.
O bildirir ki, Azad Əliyevi birlikdə iştirak etdikləri məclislərdən birində tanıyıb və daha sonra onunla bir neçə dəfə görüşüb.
“Vəzifəli şəxslərin adını çəkirdi. Bəziləri ilə qohum olduğunu, bəziləri ilə sinif yoldaşı olduğunu, bəzisi ilə əsgər yoldaşı olduğunu və ya başqa variantlarla tanış olduğunu deyirdi. Bir neçə dəfə görüşüb çörək yedik. Mən Bakıya tikinti materialları gətirirdim. O dedi ki, gömrükdə adamları var. Özünün də tikinti şirkətinin olduğunu söylədi. Mənim mallarımı daha ucuz qiymətə gömrükdən keçirəcəyini dedi. Bu da mənə sərf edirdi.
Bir neçə dəfə mal gətirmək üçün pul verdim. Sonra armatur gətirəndə hər tonunda 15 min güzəşt edəcəyini dedi. Bunun üçün 100 min verdim. Amma mallar gecikdi. Keşlədə qatarların dayandığı yük yerindən öyrəndim ki, rüsum ödənmədiyindən malı buraxmırlar. Müxtəlif bəhanələr gətirdi, dedi ki, Hesablama Palatası yoxlama aparır. Əlavə olaraq o malı çıxarmaq üçün 5 min MTN işçisinə, 10 min gömrüyə, 5 min də Hesablama Palatasına vermək adı ilə istədi. Sonra da gəmi ilə mal gətirdik. Həmin malı da gətirəndə problem yarandı. İki dəfə cərimələndik. Azad dedi ki, xərci öz hesabından çıxacaq.
Bir dəfə də dedi ki, qum-çınqıl monopliyasını Ziya Məmmədovdan alıb onun şirkətinə verirlər. Buna görə də 250 min pul lazım olduğunu dedi. Bundan başqa, tender işlərində də adamının olduğunu söyləyirdi. Müdafiə Nazirliyində tender olacaqdı. Mən də öz adamımı Müdafiə Nazirliyinə göndərdim. Orada ona dedilər ki, tender yoxdur. Həmin adamım mənə dedi ki, daha sonra ona polkovnik Sabir Əliyev adlı şəxs zəng edib, deyib ki, siz tenderi udmusunuz. Guya bizim yerlimizdir deyə sevincinin də həddi-hüdudu yox imiş. Tenderə göndərdiyim adamdan nömrəni istədim ki, həmin Əli adlı polkovniklə özüm danışım. Zəng edəndə səsindən bildim ki, həmin adam polkovnik Əli yox, elə Azadın özü imiş. Səsimi eşidən kimi telefonu söndürdü. Sonra Azadla görüşdüm. And-aman elədi ki, polkovnikin adından danışan o deyildi”.
Faiq Muxtarov işə düzəlmək üçün Azad Əliyevə pul verməsi epizodu üzrə də danışıb. O deyib ki, bir neçə il əvvəl MTN-dən ixtisara düşüb: “Məni MTN-ə işə bərpa etdirəcəkdi. MTN-də kadrlar idarəsinin rəisi ilə qohum olduğunu dedi. Düzdür, mənim də bu işdə təqsirim var. Rüşvət verməyə görə mənə veriləcək cəzaya da razıyam”.
Faiq Muxtarov ona dəymiş zərərin 300 min manat və 103 min dollar olduğunu deyir.(musavat.com)
pia.az