Azərbaycanda eyni sahə ilə bir neçə qurumun məşğul olması uzun zamandır müzakirə edilən məsələlərdəndir. Bu qurumların koordinasiyalı şəkildə işləməməsi nəticəsində ən çox əziyyət çəkən isə vətəndaşlar olur. Eyni problemlə bağlı qapı-qapı gəzən vətəndaşlar, problemi bir-birinə ötürən qurumlar... Dünya ölkələrində isə əksini görürük. Məsələn, Yaponiyada Torpaq, İnfrastruktur, Nəqliyyat və Turizm Nazirliyi var. Bizdə isə bu işlərə ayrı-ayrı qurumlar baxır, amma ortaya qoyulan iş çox aşağı səviyyədədir. Yaponiyada torpaq, turizm, nəqliyyat sahələrinin hansı səviyyədə inkişaf etdiyi göz qabağındadır. Bizdə isə... Mövcud problemlərin asan həlli üçün Azərbaycanda da bir sıra qurumların birləşdirilməsi təklif edilir.
İqtisadçı-ekspert Natiq Cəfərli Pravda.az-a açıqlamasında təklifə münasibətini bildirib.
O deyib ki, Azərbaycanda idarəetmənin təkmilləşdirilməsi ilə bağlı uzun zamandır, işlər görülür: “Yaponiyada da bir az fərqlidir. Orada prefekturalar, yerli özünüidarəetmə orqanları, bələdiyyələr fəaliyyət göstərir və onların öz səlahiyyətləri var. Əslində mərkəzi orqanlar ölkənin müxtəlif sahələrinin siyasətini hazırlamalıdır. Onların siyasəti hansı yöndə olacaq, mərkəzi büdcədən nə qədər vəsait ayrılacaq və s. Yəni mərkəzi orqanlar daha çox bununla məşğul olmalıdırlar. Azərbaycanda da yerli orqanlar gücləndirilməli, böyük şəhər bələdiyyələri yaradılmalıdır. Bələdiyyələrin işi gücləndirilməlidir. Məsələn, İstanbulun turizm sektorunun böyük bir qismini məhz İstanbul Şəhər Bələdiyyəsi tənzimləyir. Bizdə isə yerli özünüidarəetmə orqanları hələ formalaşmayıb. Formal olaraq var, amma səlahiyyətləri və məsuliyyətləri yoxdur. Ona görə də Azərbaycanda mərkəzləşdirilmiş qaydada bu işləri görmək mümkün deyil. Türkiyədən başqa bir örnək gətirsək, orada nəqliyyat sistemi də ayrı-ayrı qurumların deyil, bələdiyyənin əlindədir. Bizdə isə Bakı Nəqliyyat Agentliyi, “Baku Bus”, “Bakı Metropoliteni” QSC, Rəqəmsal İnkişaf və Nəqliyyat Nazirliyi var. Yəni bir çox orqan eyni sahədə fəaliyyət göstərir…”
pia.az
Digərxəbərlər
Populyar xəbərlər
