ABŞ senatorlarından ibarət iki partiyalı nümayəndə heyəti bazar günü Macarıstanın paytaxtına rəsmi səfər edərək ölkə hökumətini İsveçin NATO-ya üzv olmaq istəyini dərhal təsdiqləməyə çağırıb, lakin hökumət rəsmiləri senatorlarla görüşməkdən imtina ediblər...
Poliqon xəbər verir ki, bu barədə The Washington Post qəzetinin məlumatında bildirilir.
Respublikaçı senator Tom Tillis ABŞ-ın Budapeştdəki səfirliyində mətbuat konfransı zamanı deyib:
"İsveçin NATO-ya daxil olması ilə Macarıstan və baş naziriniz dünyanın azadlıqsevər xalqlarına böyük xidmət göstərəcəklər".
Demokrat senator Gina Şahin bildirib ki, Macarıstan hökumətinin heç bir üzvünün nümayəndə heyəti ilə görüşə dəvəti qəbul etməməsi məyusedicidir, lakin o, nikbindir və Macarıstan qanunvericiləri fevralın 26-da yenidən iclas keçirdikdə İsveçin üzvlüyünün ratifikasiya üçün müzakirəyə çıxarılacağına ümid edir.
Demokrat senator Kris Murpi Viktor Orban hökumətinin nümayəndə heyəti ilə görüşməkdən imtinasının qəribə və narahatedici olduğunu deyib.
Macarıstanın xarici işlər naziri Petro Siyarto cümə günü senatorların səfərini alqışladığını, lakin "Suveren ölkə olduğumuz üçün bizə təzyiq etməyə çalışmamalısınız" deyib.
Macarıstan İsveçin müraciətini ratifikasiya etməyən yeganə NATO ölkəsidir.
Qeyd edək ki, amerikalı senatorlar ABŞ Konqresinə Macarıstanda demokratiyanın geri çəkilməsini pisləyən ikipartiyalı qətnamə təqdim edəcəklər.
Fevralın əvvəlində Senatın beynəlxalq əlaqələr komitəsinin sədri Ben Kardin Macarıstana qarşı sanksiyaların tətbiqi mümkünlüyü məsələsini qaldırıb.
Poliqon.info