İsrail Pentaqon rəhbəri ilə danışıqlardan sonra Qəzzaya hücumların intensivliyini azaldacaq...
İsrail tezliklə Qəzza zolağında əməliyyatın növbəti, daha az intensiv mərhələsinə keçəcək.
Poliqon xəbər verir ki, bu barədə Reuters Agentliyi məlumat yayıb. Agentlik qeyd edir ki, bunu Yəhudi Dövlətinin müdafiə naziri Yoav Qallant ABŞ-ın müdafiə naziri Lloyd Ostinlə Qəzzaya hücumlardan mülki şəxslərə dəyən zərərin azaldılması yollarına dair danışıqlardan sonra bildirib.
Qallant, yerli əhalinin anklavın ən sıx məskunlaşdığı ərazi olan Qəzzanın şimalına qayıda biləcəyini söyləyib. Bununla belə, nə o, nə də Pentaqonun rəhbəri “cərrahi əməliyyatlara” keçidin vaxtını açıqlamayıb.
“Biz tədricən növbəti mərhələyə keçə və yerli əhalini geri qaytarmaq üçün işə başlaya biləcəyik. Ola bilsin ki, buna cənubda deyil, şimalda daha tez nail olmaq daha məqsədəuyğun olacaq”, deyə İsrailin müdafiə naziri bildirib.
Ostin, öz növbəsində, həmkarını Amerikanın İsrailin təhlükəsizliyinə dəstəyinin dəyişməz olaraq qalacağına inandırıb.
Pentaqonun rəhbəri həmçinin bildirib ki, ABŞ Fələstinin radikal HƏMAS hərəkatına qarşı hərbi əməliyyatların nə vaxta qədər aparılmasını İsrailə diktə etməyəcək. Ostin qeyd edib ki, ABŞ İsrailin özünümüdafiə hüququnu qətiyyətlə dəstəkləyir.
Poliqon.info