İranda Urmiya gölünün quruması ilə bağlı araşdırma başladıldı...

Poliqon xəbər verir ki, bu barədə "Asriran" saytına Qərbi Azərbaycan dövlət prokuroru Nasir Atbati məlumat verib.

"Urmiya gölünü ikiyə bölən və Urmiya-Təbriz şəhərlərini birləşdirən keçid yolu insan müdaxilələrindən biridir", deyə prokuror bildirib.

Yanlış əkinçilik siyasətinin də gölün qurumasına təsir etdiyini bildirən İran rəsmisi əlavə edib: "Suya qənaət edən məhsulların istehsalına xüsusi diqqət yetirilməlidir. Kənd təsərrüfatı siyasətlərində və dərin quyu lisenziyalarında da sual işarələri var".

Ədliyyə orqanlarının gölün qurumasını araşdırmaq qərarına gəldiyini bildirən Atbati "Son 15-20 ildə Urmiya gölünün vəziyyəti daha da pisləşib", deyib.

2003-cü ildə quraqlıq səbəbindən suyun səviyyəsi azalmağa başlayan Urmiya gölü 2013-cü ildə tamamilə qurumaq təhlükəsi ilə üzləşmişdi. İranın şimal-qərbində yerləşən gölün 95 faizinin hazırda quruduğu bildirilir.

Dünyanın ən böyük duz göllərindən biri olan Urmiya gölünün quruması dolanışığını əkinçilik və heyvandarlıqla təmin edən bölgə əhalisinin həyatına da mənfi təsir göstərir. Ölkədə zaman-zaman gölün fəaliyyətinin bərpası tələbi ilə nümayişlər keçirilir.

Urmiya gölü 1976-cı ildə UNESCO-nun Ümumdünya Biosfer Qoruğu Şəbəkəsinə daxil edilib.

Poliqon.info