İran prezidenti İbrahim Rəisi və venesuelalı həmkarı Nikolas Maduro Karakasda birgə mətbuat konfransı keçirib...
Poliqon “Anadolu” Agentliyinə istinadən xəbər verir ki, Rəisi İranla Venesuellanın iki mərhələdə ikitərəfli ticarəti 3 milyard dollardan 20 milyard dollara çatdırmağı planlaşdırdığını bildirib.
İran prezidenti ölkələr arasında strateji münasibətlər olduğunu bildirib və qeyd edib ki, İran “çətin günlərdə” Venesuela ilə dostluğunu sübut edib. İran prezidenti mədənçilik, enerji və bank sektorlarında əməkdaşlığın artırılmasına çağırıb və iki ölkə arasında əlaqələrin genişləndirilməsi üçün hələ də istifadə edilməmiş potensialın olduğunu deyib.
Maduro isə bildirib ki, hər iki ölkə “tarixin doğru tərəfindədir” və ABŞ-a qarşıdır. O, həmçinin ABŞ-ın keçmiş prezidenti Donald Trampın Venesuelanın “yıxılmaq üzrə olduğu” və Amerikanın onun neftini alacağı barədə bəyanatlarına da toxunub.
Hər iki prezident bir neçə sahədə razılıq əldə etdiklərini və əlaqələri daha da gücləndirmək niyyətində olduqlarını bildiriblər.
Qeyd edək ki, İran və Venesuela illərdir ABŞ sanksiyaları altındadır.
Poliqon.info