Tbilisi Şəhər Məhkəməsi müxalifətdə olan Vahid Milli Hərəkat Partiyasının keçmiş sədri Nika Melia, partiyanın üzvü Baço Dolidze və paytaxt şəhər məclisinin deputatı Zviad Kupravanı 2 min lari (təxminən 740 dollar) məbləğində cərimələyib...
Poliqon xəbər verir ki, bu barədə Gürcüstanın Birinci Kanalı məlumat yayıb. Müxalifətçilər hüquq-mühafizə orqanları ilə kütləvi davada ittiham olunur.
Hakim Natia Buskadze üç siyasətçini xırda xuliqanlıqda və polisin əmrinə tabe olmamaqda təqsirli bilib. Onun hökmünə əsasən, Melia, Dolidze və Kuprava hər biri 2 min lari ödəməlidir.
Sentyabrda Tbilisinin Qldani rayonunda Vahid Milli Hərəkatdan olan şəhər məclisinin deputatı İrakli Edzqviradze evinin yaxınlığında döyülüb. Hadisədən sonra ora gələn digər müxalifət nümayəndələri yerli sakinlər və polislə mübahisə edib. Hadisə kütləvi davaya çevrilib, nəticədə Melia, Dolidze və Kuprava saxlanılıb.
Bundan əvvəl Gürcüstan parlamentində parlament çoxluğundan olan deputatlarla müxalifət partiyalarının nümayəndələri arasında münaqişə baş verib. Şifahi mübahisə davaya çevrilib. İnsident Gürcüstan parlamentinin binasının foyesində Milli Bankın sanksiyaya məruz qalmış sabiq baş prokuror Otar Partsxaladzeyə ölkədə maliyyə əməliyyatlarına icazə verilməsi ilə bağlı yeni qərarı ilə bağlı məsələnin müzakirəsi zamanı baş verib.
Poliqon.info