Ermənistanın Müdafiə naziri David Tonoyanın sülh açıqlamasının arxasında Baş nazir Nikol Paşinyanın istəyi dayanır
Çünki Paşinyan da son çıxışında sülhün vacibliyindən ağız dolusu danışıb.
PİA.az Axar.az-a istinadən xəbər ki, bu sözləri Paşinyan və Tonoyanın ritorikasının qəfil dəyişməsinin səbəblərinə aydınlıq gətirən politoloq Elxan Şahinoğlu deyib. Siyasi təhlilçi hesab edir ki, Paşinyan və onun nazirlərinin mövqelərinin tez-tez dəyişməsi Ermənistanın indiki hakimiyyətinin Qarabağ münaqişəsinin həlli ilə bağlı baxışının formalaşmaması ilə əlaqəlidir:
“Paşinyan özü də etiraf etmişdi ki, köhnə hakimiyyətin xarici işlər naziri ilə qapalı görüşdə keçmiş danışıqların təfərrüatını dəqiqləşdirib. Onun Azərbaycan Prezidenti ilə üç görüşü də münaqişənin həllinə təsir etməyən kiçik detallar üzərində qurulmuşdu. Bu arada, ən doğru açıqlama Paşinyanın xanımından gəlib: “Ermənistanın minlərlə əsgəri heç nəyə görə Qarabağda ölüb”. Bəli, illərdir biz də bunu deyirik. Böyük ehtimalla, xanımı kimi Paşinyan da evdə bu ifadəni işlədib. Sadəcə, özü bu ifadəni rəsmən işlətsə, hakimiyyətini laxladar, ona görə də xanımının açıqlaması vasitəsilə erməni cəmiyyətinin nəbzini yoxlayır. Bu çalışmaların bizə ziyanı yoxdur”.
Politoloq baş verənləri nəzərə alaraq işğalçıya qarşı təzyiqi bir an belə azaltmamağa çağırıb:
“Hücum diplomatiyası və snayperlərimizin dəqiq atəşləri davam etməlidir. Atəşkəsin pozulması bizi yox, Ermənistan hakimiyyətini narahat etməlidir və edir də. Buna baxmayaraq, biz də yeni ideyalarla çıxış edə bilərik. Məsələn, Paşinyanın “formatı dəyişək” təklifi qarşılığında biz də danışıqların “2 + 2 modelini” irəli sürə bilərik. Yəni rəsmilər ayrı, Dağlıq Qarabağın erməni və azərbaycanlı təmsilçiləri ayrı görüşməlidirlər”.
pia.az