Ankara İsrail-Fələstin münaqişəsində qarant sisteminin yaradılmasını təklif edib

Poliqon “Anadolu” Agentliyinə istinadən xəbər verir ki, bunu jurnalistlərə açıqlamasında Türkiyənin xarici işlər naziri Hakan Fidan deyib.

Diplomat eyni zamanda bu ideyanın formalaşmasında Türkiyənin mərkəzi rolunu vurğulayıb. Nazir hər iki tərəf razılığa gəldikdən sonra Türkiyə də daxil olmaqla bir neçə ölkənin qarant kimi çıxış etməsinin vacibliyinə diqqət çəkib. Fidanın sözlərinə görə, qarant ölkələr bu sazişin icrasını təmin etmək üçün məsuliyyət daşımalıdırlar.

Hakan Fidan iki dövlətli həll yolunun qəbulu üçün İsrailə beynəlxalq təzyiqin vacibliyini də vurğulayıb. Türkiyənin xarici işlər naziri qeyd edib ki, Ankara bu məsələ ilə bağlı öz baxışını maraqlı tərəflərlə bölüşüb.

Fidan bildirib ki, Türkiyə ilə ABŞ arasında bu mövzuda aparılan müzakirələr Vaşinqtonun da iki dövlət prinsipinə əsaslanan nizamlanmanın tərəfdarı olduğunu göstərib.

Türkiyəli nazir beynəlxalq ictimaiyyətin İsrail-Fələstin probleminin həllində daha fəal rol oynamasının vacibliyinə də diqqət çəkib.

Fidanın sözlərinə görə, hazırda Türkiyədən bölgəyə sülhməramlı qüvvələrin yerləşdirilməsi gündəmdə deyil. Eyni zamanda, diplomat davamlı sülhə nail olmaq üçün iki dövlət həllinin həyata keçirilməsi istiqamətində addımların atılmasının vacibliyini vurğulayıb.

Nazir qeyd edib ki, region ölkələri əldə olunmuş razılaşmaları pozan istənilən tərəfə qarşı məsuliyyəti öz üzərinə götürməli və vahid mövqe nümayiş etdirməlidir.

Bundan əlavə, Fidan mövcud vəziyyəti sülh üçün fürsətə çevirməyin zəruriliyini vurğulayıb. Onun sözlərinə görə, İsrail-Fələstin münaqişəsinin davamlı həllinə nail olmaq üçün qarant ölkələrin mövcudluğu həlledici olacaq.

Poliqon.info