AK rəsmisi: Ukraynanın Aİ-yə daxil olması üçün 6-11 il lazım olacaq...

Poliqon "Kleine Zeitung" qəzetinə istinadən xəbər verir ki, Avropa Komissiyası nümayəndəsi Kiyevin Avropaya inteqrasiya ilə bağlı çoxlu işi görməli olduğunu deyib.

Martin Zellmayer xatırladıb ki, bir vaxtlar Avstriyanın Avropa İttifaqıba üzv olması üçün 6, İspaniyanın isə 11 il lazım olub.

"Ukrayna ortada bir yerə düşə bilər... Bununla belə, Kiyevin hələ çox işi var, mən xüsusilə, məhkəmə sisteminin müstəqilliyi və administrasiyanın effektivliyinə nail olmaq üçün islahatları nəzərdə tuturam", deyə Martin Zellmayer bildirib.

Eyni zamanda, Avropa Komissiyasının nümayəndəsi qeyd edib ki, Avropa Ukraynanın siyasi birliyə qəbul edilməsi ilə bağlı Kiyevə verdiyi vədi tutmalıdır.

Qeyd edək ki, Avropa İttifaqı Şurasının prezidenti Şarl Mişel dekabrın 14-də İttifaq ölkələrinin Ukrayna və Moldova ilə Aİ-yə üzvlük barədə danışıqların başlaması barədə qərar qəbul etdiyini bildirib. Həmçinin, Gürcüstana Aİ üzvlüyünə namizəd statusu verildiyi açıqlanıb. Bundan başqa, gələn ilin mart ayınadək Bosniya və Herseqovina təşkilata üzvlük üçün bütün meyarlara tam uyğunluğu təmin edərsə, ölkənin Avropa İttifaqına üzvlüyü barədə danışıqların başlaması məsələsinin yenidən nəzərdən keçiriləcəyi bildirilib.

Ukrayna prezidenti Volodimir Zelenski xalqa müraciətində bildirib ki, Kiyev öz üzərinə düşən işi - Avropa Komissiyasının yeddi tövsiyəsini mütləq yerinə yetirəcək: "Çox vacibdir ki, danışıqların başlanğıcında Avropa İttifaqı tərəfindən Ukrayna ilə bağlı siyasi qərara oxşar hazırlıq olsun".

Poliqon.info