Azərbaycanın ərazi bütövlüyünü tanıyan Paşinyanın bu şəkildə davranışları nədən xəbər verir?..
Politoloq: “Biz zaman-zaman Ermənistanın Baş naziri və onun komandasından alt-üst açıqlamaların şahidi oluruq”.
“Bunlardan sonra Ermənistanın Baş naziri anklav və eksklavlar məsələsinə toxunursa, bu o deməkdir ki, onlar məsələlərə qeyri-ciddi yanaşırlar”.
Bu sözləri politoloq Xəyal Bəşirov Ermənistan Baş nazirinin son müsahibəsini Poliqon-a şərh edərkən qeyd edib.
Ermənistan Baş naziri Nikol Paşinyan ölkəsinin İctimai Televiziyasına müsahibəsində anklav və eksklavlar məsələsinə toxunub. Paşinyan bildirib ki: “Azərbaycan 8 kənd məsələsini qaldırır, biz də öz növbəmizdə deyirik ki, bizim 8 kənd problemimiz var, çünki Tavuş rayonunda Azərbaycanın işğal etdiyi ərazilərimiz var. Anklavlar mövzusunun müzakirəsi sadə səbəbdən qaçılmazdır, çünki 29 800 kvadrat kilometr əraziyə Artsvaşen də (Başkənd) daxildir. Kim anklavlardan danışırsa, masanın üstünə bu anklavların mövcudluğunun nəyə əsaslandığını göstərən xəritə qoysun. Bu, sadə sual deyil”.
Azərbaycanın ərazi bütövlüyünü tanıyan Paşinyanın bu şəkildə davranışları nədən xəbər verir və adi həqiqəti rədd etməklə Ermənistan nəyə nail ola bilər?
Paşinyanın növbəti mənasız fikirlərini Poliqon-un əməkdaşı Siyasi və Hüquqi Araşdırmalar Mərkəzinin (SHAM) sədri, politoloq Xəyal Bəşirov ilə müzakirə edib.
Xəyal Bəşirov: “Ermənistanın Baş naziri yenə də atdığı addımlarla səsləndirdiyi fikirlər arasında ciddi ziddiyyətin olduğunu nəzərə çatdırır”.
Ermənistanın Baş nazirinin Azərbaycanın ərazi bütövlüyünü Almata bəyannaməsi və BMT nizamnaməsi çərçivəsində tanıdığını dilə gətirdiyini xatırladan politoloq Poliqon-a açıqlamasında qeyd edib ki, əgər Ermənistan Azərbaycanın ərazi bütövlüyünü tanıyırsa və onda ölkəmizə qarşı hər hansı ərazi iddiası da olmamalıdır:
“Biz zaman-zaman Ermənistanın Baş naziri və onun komandasından alt-üst açıqlamaların şahidi oluruq. Bir tərəfdən ötən ilin 6 oktyabrda Avropanın siyasi birliyinin Çexiyanın Praqa şəhərində keçirilən ilk zirvə toplantısında Ermənistanın Baş naziri Azərbaycanın ərazi bütövlüyünü Almata bəyannaməsi və BMT nizamnaməsi çərçivəsində tanıdığını dilə gətirdi. Bu da o deməkdir ki, Ermənistan Azərbaycanın ərazi bütövlüyünü tanıyır və ona hər hansı ərazi iddiası olmamalıdır. Həmçinin Nikol Paşinyan nazirlər kabinetinin iclasında, parlamentdə çıxışında və başqa açıqlamalarında Azərbaycanın ərazi bütövlüyünü dəfələrlə dilə gətirib.
Bunlardan sonra Ermənistanın Baş naziri anklav və eksklavlar məsələsinə toxunursa, bu o deməkdir ki, onlar məsələlərə qeyri-ciddi yanaşırlar. Ermənistanın baş naziri yenə də atdığı addımlarla səsləndirdiyi fikirlər arasında ciddi ziddiyyətin olduğunu nəzərə çatdırır. Bu gün də Nikol Paşinyan Azərbaycanın ərazi bütövlüyünü tanımamaq üçün belə bir bəhanələr gətirir.
Biz Ermənistandan qarşılıqlı şəkildə sərhədlərin delimitasiya və demarkasiyası ilə bağlı müzakirələr tələb edirdik. Azərbaycan Avropa İttifaqının prezidentinin təşəbbüsü ilə keçirilən altı Brüssel görüşündə də daim Ermənistana çağrışlar edib. Hətta, birgə sənəd komissiyası da yaradılmışdı. Azərbaycan Ermənistan deyirdi ki, danışıqlar aparaq və masa üstündə hansı ərazilərin kimə aid olması barədə müzakirələr getsin. Amma hər dəfə Ermənistan bu danışıqlardan qaçdı”.
Nərminə UMUDLU
Poliqon.info
Digərxəbərlər
Populyar xəbərlər
